A janë në dijeni Nusret Ziba dhe Sead Arsllani, anëtarët shqiptarë të Këshillit të Drejtorëve në Telekom, të emëruar nga vetë Qeveria që mban 34.81% të aksioneve në këtë kompani, se është hequr opsioni në gjuhën shqipe nga shërbimi automatik?
Heqja e mesazhit “Për SHQIP – shtypni 2” përbën një sulm të drejtpërdrejtë ndaj të drejtave gjuhësore të shqiptarëve në Maqedoninë e Veriut dhe është dëshmi e qartë e diskriminimit institucional që po zvarritet në çdo segment publik dhe gjysmë-publik.
Shqiptarët janë taksapagues, konsumatorë dhe qytetarë të barabartë në këtë shtet, dhe të mos kenë as mundësinë për të komunikuar në gjuhën e tyre amtare në një shërbim si Telekomi, është jo vetëm fyes, por skandaloz.
Ku janë përfaqësuesit tanë? Ku janë reagimet zyrtare? Apo janë vendosur aty vetëm për të heshtur në momentet më kritike? Nëse Ziba dhe Arsllani nuk janë në gjendje të mbrojnë as një të drejtë kaq minimale si përdorimi i gjuhës shqipe në Telekom, atëherë për çfarë shërbejnë?!
Shqiptarët nuk kanë nevojë për figura dekori, por për zë të fortë dhe veprim konkret. Heshtja është bashkëfajësi!