Ish-ministri i Drejtësisë, Krenar Lloga, ka reaguar ashpër ndaj qeverisë së re në Maqedoninë e Veriut, duke e quajtur atë “antimaqedonase” dhe duke paralajmëruar një rikthim të rrezikshëm drejt politikave që e largojnë vendin nga rruga evropiane.
“Kjo Qeveri antimaqedonase emrin nuk do ta kthejë, POR: regjimin – PO, serbizmin – PO, izolimin – PO, emigrimin – PO, pasaportat bullgare – PO, propagandën anti-BE – PO, maqedonasin e varfër – PO!”, ka deklaruar Lloga.
Ky reagim i fortë vjen menjëherë pas raportit të fundit të Parlamentit Evropian, në të cilin shprehen shqetësime serioze për ndikimin serb në politikën e brendshme të Maqedonisë së Veriut, përmes strukturave të lidhura me liderin e VMRO-DPMNE-së, Hristijan Mickoski.
Sipas raportit:
“Maqedonia e Veriut po përjeton ndikime të theksuara nga ‘bota serbe’, të kanalizuara përmes aktorëve politikë vendas që po minojnë rrugën e saj drejt BE-së dhe po promovojnë narrative euroskeptike.”
Raporti përmend gjithashtu përhapjen e propagandës anti-BE dhe paralajmëron se klima politike po largohet nga vlerat demokratike të unionit. Kjo është parë si një pasqyrim i thellimit të ndikimit gjeopolitik të Serbisë dhe Rusisë në rajon, në një kohë kur integrimi evropian i Ballkanit është sërish në fokus.