Komisioni Evropian ka konfirmuar se ka qenë i shqetësuar kur Petar Bogojevski u emërua drejtor i Agjencisë që menaxhon me “Erasmus”. Me këtë rast, për “Slloboden Peçat” Komisioni Evropian ka informuar se kanë kontaktuar me Ministrinë e Arsimit dhe Shkencës dhe kanë shprehur shqetësim për faktin që Petar Bogojevski është emëruar drejtor i Agjencisë për programe arsimore dhe mobilitet evropian. Shqetësimin drejtuar MASH-it, KE e ka arsyetuar me një konflikt të mundshëm interesi dhe arsye etike, të bazuara në disa korniza ligjore që kanë të bëjnë me Agjencinë që menaxhon me fondet nga programi i Bashkimit Evropian “Erasmus+” i dedikuar për mbështetje në arsim, trajnim, të rinj dhe sport në shtetet e Evropës, përfshirë edhe vendin tonë.
“Komisioni ka kontaktuar me organin kombëtar në Maqedoninë e Veriut dhe ka shprehur shqetësim lidhur me këtë emërim, për shkak të një konflikti të mundshëm interesi dhe çështjeve etike, bazuar në disa korniza ligjore, përfshirë Rregulloren për Erasmus+, Rregulloren për Korpusin Evropian të Solidaritetit, Rregulloren financiare të BE-së dhe Marrëveshjen për Stabilizim dhe Asociim me Maqedoninë e Veriut”, ka thënë për “Slloboden Peçat” zëdhënësi i Komisionit Evropian. Ndërsa Bogojevski, para dy ditësh kur informoi se me kryeministrin Hristijan Mickoski e kanë përmirësuar marrëveshjen e koalicionit dhe se do të kalojë në një pozitë tjetër udhëheqëse, nuk përmendi që nga Komisioni Evropian është kërkuar largimi i tij. Në njoftimin për publikun, ai madje si pikën e katërt e njoftoi largimin nga Agjencia që menaxhon me fondet e “Erasmus+”, duke e paraqitur atë si një riorganizim të rregullt të kuadrove brenda koalicionit.
“E katërta, është rënë dakord për rishpërndarjen e pozicioneve dhe institucioneve që do të drejtohen nga Koncepti Maqedonas brenda pushtetit ekzekutiv, me çka është konfirmuar që kryetari i Konceptit Maqedonas, doktori Petar Bogojevski, do të drejtojë një tjetër institucion”, thuhej në njoftimin për publikun nga partia.
Në maj të këtij viti, Ministria e Arsimit dhe Shkencës në Maqedoni ka pranuar një letër nga Komisioni Evropian me udhëzime për “Erasmus+”, përmbajtja e së cilës, sipas informacioneve tashmë të konfirmuara, ka qenë serioze dhe nuk ka të bëjë vetëm me Bogojevskin, por me probleme shumë më të thella në Agjencinë që menaxhon me fondet e “Erasmus+”. Pjesa më e madhe e problemeve të shënuara në atë letër, kanë të bëjnë me dyshime të paqarta për struktura korruptive dhe të rrjeteve brenda në Agjenci, që kanë kontribuar që ajo për vite të tëra të mos punojë sipas standardeve evropiane.
Përmbajtja, sipas informacioneve të konfirmuara, ishte e lidhur edhe me kallëzimin penal për keqpërdorim të 2.2 milionë eurove, para evropiane, që Komisioni Evropian ia kishte kërkuar Agjencisë për Programe Arsimore Evropiane dhe Mobilitet t’i kthente, për shkak të dyshimeve se në të kaluarën ato ishin “shpërndarë” dhe ndarë në mënyrë jotransparente nga një rrjet i supozuar korruptiv për të cilin ende nuk ka informacione se është shuar, dhe në të cilin kanë qenë të përfshirë persona nga Agjencia por edhe nga jashtë – vlerësues, persona juridikë dhe fizikë, drejtues në vite të caktuara etj.
Në letrën drejtuar MASh-it, Komisioni Evropian ka shprehur pakënaqësi që në Maqedoni ky skandal korruptiv me para evropiane nuk është zgjidhur.