Hoxhë Sadullah Bajrami, një nga zërat kritikë të kohëve të fundit, ka shpërthyer në një letër të hapur drejtuar përfaqësuesve të koalicionit VLEN, duke ngritur akuza të rënda për padrejtësi, përjashtim dhe dhunë morale ndaj ish-luftëtarëve dhe familjeve të tyre.
Në një tekst të drejtpërdrejtë dhe emocional, ai i pyet përfaqësuesit aktual:
“A keni fare turp? Kujt i shërbeni dhe kë përfaqësoni në të vërtetë?”
Duke përmendur përvojat e dhimbshme të 24 viteve pas konfliktit, Bajrami shpreh zhgënjimin se ata që dikur dhanë gjithçka për pragun e shtëpisë, sot janë të harruar dhe të përbuzur.
“Edhe pse u shpall një lloj amnistie, ne menduam se do të na përfshinte për sakrificën tonë. Por realiteti tregoi se nuk ishim as pjesë e kujtesës suaj,” – thekson ai.
Më tej, Hoxha hedh akuza edhe më të rënda, duke deklaruar se tani janë në shënjestër edhe fëmijët dhe vajzat e tyre, të cilat, sipas tij, përjashtohen padrejtësisht nga të drejtat, përfshihen në “lista të zeza” dhe pengohen nëpër pika kufitare, vetëm pse janë “bijat tona”.
“Çfarë faji kanë ato, i nderuar zëvendësministër i Punëve të Brendshme?” – pyet ai me ton të ashpër.
Letra mbyllet me një mesazh të fortë moral dhe shpirtëror, duke kujtuar se as postet nuk janë të përjetshme, dhe se të gjithë do të japin llogari para Allahut për padrejtësitë e bëra.
“Populli nuk harron. Zoti nuk harron.”
Letra e Hoxhës ka ngjallur reagime të shumta në rrjetet sociale dhe në opinionin publik shqiptar në Maqedoninë e Veriut, ndërsa pritet një reagim nga ana e përfaqësuesve të VLEN-it.