Kina ka ndërmarrë një nga inkursionet më të mëdha ajrore të muajve të fundit drejt Ngushticës së Tajvanit, duke dërguar 74 avionë ushtarakë dhe gjashtë anije detare në afërsi të ishullit, njoftoi Ministria e Mbrojtjes e Tajvanit.
Sipas autoriteteve tajvaneze, 61 nga avionët kanë kaluar vijën e mesme të ngushticës – një kufi jozyrtar që tradicionalisht shmanget nga të dyja palët.
Ky zhvillim ndodhi vetëm një ditë pasi një anije patrulluese britanike, HMS Spey, kaloi përmes ngushticës, një veprim i mirëpritur nga Tajvani si dëshmi e mbështetjes ndërkombëtare për të drejtat e lundrimit, por i dënuar nga Pekini si “provokues” dhe “minues i stabilitetit”.
BE: Çdo vendim për ndërtim urash mbi Ibër duhet të merret me përfshirjen e të gjitha komuniteteve
“Forcat e Armatosura të Kinës kanë shqetësuar qëllimisht situatën dhe kanë minuar paqen dhe sigurinë në rajon,” deklaroi ushtria kineze, duke shtuar se manovrat ishin një përgjigje ndaj provokimeve të jashtme.
Ndërkohë, Tajvani aktivizoi forcat e tij ajrore, anijet dhe sistemet tokësore të raketave për të monitoruar situatën.
Ngushtica e Tajvanit, një rrugë ujore strategjike që ndan Tajvanin nga Kina kontinentale, është shpesh skenë e tensioneve midis Pekinit dhe aleatëve perëndimorë.
Tajvani e përshëndeti kalimin e anijes britanike si “një riafirmim të statusit të ujërave ndërkombëtare”, ndërsa ambasada de facto britanike në Taipei tha se operacioni u zhvillua “në përputhje të plotë me të drejtën ndërkombëtare”.
Megjithëse nuk është e qartë nëse inkursioni ajror ishte një kundërpërgjigje direkte ndaj lëvizjes britanike, analistët e sigurisë paralajmërojnë për një përshkallëzim të qëndrimeve ushtarake dhe psikologjike të Pekinit.
Sipas tyre, manovrat e tilla synojnë të intimidojnë popullsinë tajvaneze dhe të testojnë gatishmërinë e saj mbrojtëse.
Pekini e konsideron Tajvanin, i cili qeveriset në mënyrë demokratike, si territor të vetin dhe ka intensifikuar presionin ushtarak në rajon, duke rritur shqetësimet për një konflikt të mundshëm në të ardhmen.