Kryetarja e Qytetit të Shkupit, Danella Arsovska, ka publikuar një reagim ironik në rrjetet sociale, duke thumbuar drejtpërdrejt Visar Ganiun dhe Izet Mexhitin lidhur me skandalin e legalizimeve të dyshimta në Komunën e Çairit.
Në tekstin e saj, Arsovska “imiton” një bisedë të supozuar mes dy figurave të njohura politike:
“🥸Shef, jam i brengosur, ç’të bëjmë – Danella ka edhe 151 raste me falsifikime tona.
😇Rri urtë, bëj të pafajshëm dhe sillu sikur s’po ndodh asgjë – do ua hedhim fajin të punësuarve.”
Ky koment i fortë vjen pas deklaratave të Arsovskës se ka dorëzuar në Prokurori 151 raste me dokumente të falsifikuara të legalizimeve, për të cilat ajo pretendon se janë bërë nën drejtimin e Ganiut, ish-kryetar i Komunës së Çairit, dhe me dijeninë e Izet Mexhitit.
Sipas saj, disa nga këto legalizime janë bërë brenda 24 orëve pas denoncimeve, gjë që ajo e cilëson si “skandal i pashembullt institucional”.