Pas shtatë viteve me dyer të mbyllura, nga sot kompleksi “Fshati maqedonas” rikthehet në funksion për turistët por edhe banorët vendas. Qeveria dëshiron të ringjallë edhe njëherë projektin e dështuar të ish kryeministrit Nikolla Gruevski, i cili mbijetoi vetëm dy vjet. Me këtë etno kompleks, do të menaxhojë kompania “La Terraza” ndërsa pagesa e qirasë mujore do të jetë 3500 euro. Kaq paguanin edhe koncesionerët e mëparshëm hoteli “Kuins” dhe “Tineks”.
“Në periudhën që vijon të kujdesemi për gjithë atë që për fat të keq në shtatë vitet e fundit ishte harruar, shkatërruar dhe devastuar. Ngadalë por sigurt po e rinovojmë dhe përsëri po i’a kthejmë shkëlqimin dhe e vendosim në funksion, një nga një sipas prioriteteve dhe mundësive”, tha Hristijan Mickoski – Kryeministër.
Që të arrini deri te kompleksi, nga Qendra e Shkupit ju nevojiten 30 minuta me veturë. Ka edhe linjë me autobus, por nuk është thuajse fare funksional.
“Transport me autobus ka por është shumë i rrallë. Shpresoj se me ardhjen e një kryetari të ri në Qytetin e Shkupit do të ketë linja më të shpeshta”, u shpreh Ivica Tomovski – SHPPPQ.
Ndërtimi i Etno fshatit maqedonas, filloi në vitin 2011 në kohën kur me Qeverinë udhëhiqte kryeministri i atëhershëm Nikolla Gruevski, ndërsa në përdorim zyrtar u lëshua më 22 qershor 2016. Qeveria për ndërtimin e këtij fshati investoi 5,2 milion euro ndërsa 1,3 milion euro të tjera u harxhuan për rregullimin e brendshëm. Tre elektro automobilat për bartjen e valixheve për vizitorët kushtuan 24,000 euro. 4200 kishin kushtuar shenjat udhëzuese ndërsa 2700 euro shportat e mbeturinave. Kompleksi ndodhet rrugës për në Vodno, mbi fshatin Nerez. Përbëhet nga 12 shtëpi autentike, me hapësira ku prezantohen zanatet maqedonase, disa prej shtëpive shfrytëzohen si dhoma hoteli, ndërsa ka edhe restorant. Hera e fundit kur ky kompleks kishte dyer të hapura ishte viti 2018, ndërsa që atëherë, banorët e vetëm kanë qenë katër punonjësit e sigurimit. Koncesionerët paraprak u tërhoqën për shkak humbjeve financiare prej 150 mijë eurove ndërsa shërbimi për punë të përgjithshme e Qeverisë vazhdimisht paguante harxhimet për sigurim, ndërsa humbjet shënonin madje 300,000 euro. /Alsat.mk