Deshqiptarizimi i institucioneve shtetërore në Maqedoninë e Veriut po vazhdon me ritme alarmante edhe nën qeverinë e re Vlen–VMRO. Në listën e fundit të punësimeve në REK Oslomej, janë përzgjedhur 50 persona përmes agjencisë, por asnjë prej tyre nuk është shqiptar.
Në listat që tashmë janë bërë publike (shih më poshtë), figurojnë ekskluzivisht emra maqedonas, pa përfaqësim të vetëm të shqiptarëve, pavarësisht se bëhet fjalë për një rajon ku shqiptarët janë komunitet i madh dhe historikisht i pranishëm në këtë institucion energjetik.
Ky është një alarm serioz për diskriminim të organizuar institucional, që vjen vetëm pak javë pas formimit të qeverisë së re. Qytetarët shqiptarë e konsiderojnë këtë si një vazhdimësi të një politike të heshtur të përjashtimit, tashmë me përgjegjësi direkte të koalicionit VLEN–VMRO.
Kush do të japë llogari për këtë përjashtim të qëllimshëm?
Asnjë sqarim zyrtar nuk është dhënë deri më tani nga institucionet përgjegjëse apo nga përfaqësuesit shqiptarë në qeveri. Heshtja e tyre vetëm sa e thellon bindjen se kjo nuk është rastësi, por pjesë e një procesi sistematik për shqiptarizimin e institucioneve publike.
Përfaqësues të shoqërisë civile dhe aktivistë kërkojnë hetim të menjëhershëm dhe përgjegjësi politike, duke paralajmëruar se nëse ky trend vazhdon, besimi i qytetarëve në barazinë dhe drejtësinë në këtë shtet do të shembet përfundimisht.