Premtimet dhe deklaratat për Ligjin për përfaqësim të drejtë dhe adekuat në Maqedoninë e Veriut vazhdojnë të përsëriten dita-ditës, por në opinion nuk ka ende asgjë konkrete. Përfaqësues të koalicionit VLEN theksojnë se ligji do të jetë gati shumë shpejtë, një qëndrim që është ritheksuar edhe nga kryetari i Lëvizjes Besa, Bilall Kasami.
Kasami shpjegon se po zhvillohen biseda intensive mes partnerëve të koalicionit dhe shpreh besimin se ligji shumë shpejt do të jetë për diskutim në qeveri, duke kaluar në fazat e tjera. Ai thekson se vonesa ka ardhur si pasojë e debatit të brendshëm dhe largimit të Arben Taravarit, të cilin e quan “faktor destruktiv”. Kasami shprehet i bindur se tani ligji do të avancojë përpara opinionit publik.
Në lidhje me akuzat që nga 205 punësime të reja në administratë vetëm dy janë shqiptarë, Kasami thotë se koalicioni nuk do të hyjë në debat politik për numrin e punësuarve në institucione të caktuara, pasi situata ndryshon dhe në disa institucione mund të ketë më shumë shqiptarë sesa maqedonas, ose anasjelltas. Ai shton se qëllimi është ruajtja e përfaqësimit adekuat sipas kushtetutës, duke mbajtur një marrëveshje politike për këtë çështje.
Zotimet për miratimin e Ligjit për përfaqësim të drejtë janë dhënë më parë edhe nga zëvendëskryeministrat e koalicionit, duke e bërë këtë një prej temave kyçe të bisedimeve brenda qeverisë.