Shkup, 5 Qershor 2025 – Në skenën politike të Maqedonisë së Veriut po intensifikohen debatet rreth ndryshimeve në Kodin Zgjedhor dhe numrit të njësive zgjedhore. Por zëra kritikë po paralajmërojnë se ky debat është vetëm një “truk i qëllimshëm” për të shmangur përballjen me çështje shumë më të thella: diskriminimin sistematik ndaj shqiptarëve dhe ngecjen e përgjithshme të shtetit.
Sipas analistëve dhe vëzhguesve politikë, përfshirë Krenar Llogën, ky manovrim politik është një përpjekje për të devijuar vëmendjen publike nga realiteti i përditshëm i përjashtimit të shqiptarëve nga institucionet dhe vendimmarrja shtetërore.
“Hedhja në një fushatë të parakohshme, vetëm për ta degraduar debatin, tregon shterpësinë jo vetëm të VLEN-it dhe VMRO-së, por edhe të atyre që deri dje ishin pjesë e kësaj ‘gjelle’ politike,” shprehet Lloga, duke ju referuar diskurseve të mëhershme që përdornin simbole si “flamuri-shkopi” apo “çiftelia” për të mbuluar mungesën e thelbit politik.
Ai thekson se në politikë, agjendat i përcakton ai që ka guximin të flasë për problemet reale. Në këtë kontekst, ai nënvizon se Fronti Evropian ka mundësinë të vendosë drejtimin e duhur – jo vetëm duke pranuar ata që braktisin një qeveri me qasje diskriminuese, por edhe duke vënë kufij të qartë për çdo tendencë klanore që cenon interesin kolektiv të shqiptarëve.
“Organizimi politik i shqiptarëve nuk mund të shkatërrohet për interesa të përkohshme personale. Shqiptarët nuk janë 10%, ata janë mbi 29% e popullsisë sipas të dhënave zyrtare, dhe kërkojnë përfaqësim të denjë e proporcional në çdo nivel të shtetit,” thekson ai.
Lloga paralajmëron se çdo përpjekje për të maskuar përjashtimin e shqiptarëve me debate teknike si ai për Kodin Zgjedhor, është vetëm thellim i krizës politike dhe sociale në vend.