Një motoçiklist njëzetvjeçar nga rrethina e Kumanovës ka ndërruar jetë pasi është përplasur në një shtyllë betoni në afërsi të fshatit Orashac, drejt rrugës Kumanovë–Shën Nikollë, njoftoi sot policia.
Sipas njoftimit, ngjarja ka ndodhur mbrëmë rreth orës 21:00, kur në SPB Kumanovë është raportuar se në rrugën lokale nga fshati Orashac, drejt rrugës rajonale Kumanovë–Shën Nikollë, M.P. (20) nga fshati Dobroshan i Kumanovës, duke drejtuar një motoçikletë BMW pa targa, ka humbur kontrollin dhe është përplasur në një shtyllë betoni.
“Si pasojë e lëndimeve të marra, motoçiklisti ka ndërruar jetë në vendin e ngjarjes, ndërsa vdekjen e ka konstatuar mjeku nga Ndihma e Shpejtë. Në vendin e ngjarjes ka kryer ekspertizë një ekip i SPB Kumanovë, ndërsa me urdhër të prokurorit publik, trupi i pajetë është dërguar për autopsi”, shtojnë nga MPB.