Një skenë shqetësuese është fotografuar në zemër të Çarshisë së Shkupit, përballë mozaikut monumental ku përjetësohen figurat më të ndritura të historisë shqiptare, si Adem Jashari, Gjergj Kastrioti – Skënderbeu, Isa Boletini, Hasan Prishtina, Naim Frashëri, Qerqiz Topulli e të tjerë.
Në vend që të trajtohet me nderimin që i takon, ky vend simbolik është kthyer në një “liqen” mbeturinash. Qese plastike, shishe, mbetje ushqimore dhe papastërti të tjera notojnë përballë fytyrave që përfaqësojnë sakrificën dhe dinjitetin e kombit shqiptar.
Një qytetar, i revoltuar nga gjendja e rëndë, ka publikuar imazhe dhe ka reaguar me tone të ashpra ndaj komunës së Çairit dhe kryetarit të saj, Visar Ganiu, të cilin e akuzon për “mosinteresim kriminal” dhe “varrosje morale të figurave kombëtare”.
“Ky nuk është vetëm një degradim estetik – është një shqyerje publike e nderit tonë kombëtar. Ky mozaik nuk është mur i zakonshëm – është fytyra jonë si popull. Dhe sot, ajo fytyrë është e mbuluar me mbeturina për shkak të papërgjegjësisë së pushtetit vendor shqiptar në Shkup,” – shkruan qytetari në një postim që po shpërndahet gjerësisht në rrjetet sociale.
Reagimi po ngjall jehonë në opinionin publik, ndërsa qytetarët kërkojnë masa urgjente për pastrimin e hapësirës dhe ruajtjen e dinjitetit të simboleve kombëtare në hapësirat publike të Shkupit.