Një koment me përmbajtje ofenduese dhe përçmuese ndaj shqiptarëve është bërë nga Petar Bogojevski, drejtor aktual në Agjencinë Nacionale për Programet Evropiane Arsimore dhe Mobilitet, që vepron në kuadër të Qeverisë së re VLEN-VMRO.
Në një debat në rrjetet sociale, Bogojevski iu bashkua një komenti ku shqiptarët përqeshen për pretendimet e tyre historike mbi origjinën ilire, dardane apo pelazge. Ai i shkroi përdoruesit “Nikola Be”, i cili tallte shqiptarët:
“Mirë është të njihet historia e Kaukazit.”
Ky koment aludon në një teori të pavërtetuar dhe denigruese, që mohon autoktoninë e shqiptarëve në Ballkan, duke i lidhur ata me rajonin e Kaukazit – një narrativë që shpesh është përdorur nga qarqe nacionaliste për të zhvlerësuar historinë e shqiptarëve.
Fakti që një përfaqësues i një institucioni publik, përgjegjës për programet evropiane arsimore dhe mobilitetin e të rinjve, shprehet në këtë mënyrë nxit reagime dhe ngrit shqetësime për përfshirjen e diskursit përjashtues dhe nënçmues brenda institucioneve shtetërore.
Aktualisht, Bogojevski është pjesë e administratës së Qeverisë së re të përbashkët mes VLEN dhe VMRO-DPMNE, që erdhi në pushtet me premtime për bashkëjetesë, barazi dhe integrim evropian. Komente të tilla mund të minojnë besimin publik dhe bashkëpunimin ndëretnik që është thelbësor për stabilitetin në vend.