shkruan Danella Arsovska:
Një person si Viki Ganiu, në vend që të përballet me kallëzim penal për mbi 150 ndërtime të paligjshme dhe të rrezikshme nga të cilat ka përfituar financiarisht, duket se është më pranë marrjes së një granti nga Fondi për Inovacion. Ironikisht, nëse nuk ndëshkohet për këto shkelje flagrante, ndoshta duhet shpërblyer për “zbulimin” e udhëtimit në kohë.
Nëse krahasojmë dy imazhe satelitore – një nga dita e sotme dhe një tjetër nga viti 2023 – është mëse e qartë se një ndërtesë e ndërtuar rishtazi, tani figuron e regjistruar si objekt i ndërtuar para vitit 2011. Kjo është shkelje e hapur e ligjit dhe një manipulim i rëndë i dokumentacionit zyrtar. Sipas të dhënave të Agjencisë së Kadastrës, në vitin 2023 në atë lokacion nuk ekzistonte asnjë ndërtesë.
Prokuroria Publike nuk sheh asnjë problem në këtë farsë, duke lejuar që një ndërtesë e ndërtuar në vitin 2024 të legalizohet si objekt ekzistues para më shumë se një dekade. Kjo heshtje institucionale është e pakuptueshme dhe e papranueshme.
Pamjet satelitore janë të qasshme publikisht në sistemin e Kadastrës dhe mund të verifikohen nga çdokush – madje edhe nga vetë Prokuroria. Sot kemi arsye serioze për të besuar se sistemi i Kadastrës mund të “bjerë” në mënyrë të çuditshme, ndërsa provat që ndodhen në Komunën e Çairit mund të fshihen ose të shkatërrohen. Kemi paralajmëruar publikisht për këtë dhe kemi ofruar dëshmi, por asnjë institucion nuk ka ndërmarrë hapa për t’i siguruar këto prova.
Apeli im është i drejtpërdrejtë: Ose Viki Ganiu të përballet me përgjegjësi penale për falsifikim dokumentesh dhe legalizim të ndërtimeve të paligjshme, ose le t’i japim një grant për “zbulimin” më të ri shkencor në vend – udhëtimin në kohë.