Zv/kryeministri Izet Mexhiti në një paraqitje për media komentoi veprimet e fundit të kryetares së Qytetit të Shkupit, Danella Arsovska, duke vënë në dukje se pritën përgjigje për mosrealizimin e projekteve apo çështje të tjera, por ajo po mundohet të luajë rolin e inspektorit kontrollor, rol që sipas tij nuk i përket dhe për të cilat deklarata do të ketë padi.
Megjithatë, gjatë fjalës së tij, Mexhiti shmangu plotësisht komentimin mbi akuzat e Danellës për ndërtimet ilegale dhe falsifikimet në Komunën e Çairit, një temë kyçe që ka shkaktuar reagime të shumta. Në vend të kësaj, ai akuzoi BDI-në se po fshihet pas Danellës dhe e përdor atë për të destabilizuar vendin.
“Problemi nuk është ajo që bën Danella, por dështimi i planit të Ahmetit dhe Taravarit. Rrugën tani burrat e BDI-së ia kanë lënë Danellës dhe Levicës. Kjo është strategjia e fundit e Ahmetit për destabilizim të vendit, përmes komunave dhe në bashkëpunim me Levicën dhe Danellën,” deklaroi Mexhiti.
Ai shprehu keqardhje që Danella është bërë instrument i Blerim Bexhetit dhe sugjeroi që ajo, përveç Çairit, të fokusohet edhe në komunën e Sarajit, ku sipas tij, ndërmarrjet publike janë në prag të falimentimit. Mexhiti kërkoi përgjigje edhe për kontratën e djalit të Blerim Bexhetit për shërbime intelektuale, duke përmendur moshën e tij vetëm 17 vjeçare.