Ministria e Shëndetësisë në Gaza tha se 79 trupa u sollën në spitale në 24 orët e fundit, ndërsa 211 persona u plagosën, duke e çuar numrin e të plagosurve në 122.593.
Rritet në mbi 53.900 numri i palestinezëve të vrarë nga sulmet izraelite në Gaza
Ankara
Të paktën 53.901 palestinezë janë vrarë në luftën gjenocidale të Izraelit që nga tetori i vitit 2023, tha sot Ministria e Shëndetësisë, transmeton Anadolu.
Në një deklaratë, Ministria tha se 79 trupa u sollën në spitale në 24 orët e fundit, ndërsa 211 persona u plagosën, duke e çuar numrin e të plagosurve në 122.593.
“Shumë viktima janë ende të bllokuara nën rrënoja dhe në rrugë pasi ekipet e shpëtimit nuk janë në gjendje t’i arrijnë”, shtoi ajo.
Më herët, agjencia e lajmeve Wafa tha se të paktën 19 palestinezë u vranë sot në mëngjes në sulmet vdekjeprurëse të Izraelit në gjithë Rripin e Gazës.
Wafa citoi burime lokale duke thënë se shtatë persona u vranë dhe 60 të tjerë u plagosën në një sulm ajror izraelit në zonën Al-Mawasi të Rafah, në jug të Rripit të Gazës.
Pesë persona të tjerë u vranë në një sulm vdekjeprurës me dron në një shtëpi të familjes “Al-Sharif” në pjesën veriperëndimore të Khan Younisit, në Gazën jugore.
Agjencia palestineze tha se një familje e tërë, e përbërë nga një baba, një grua dhe dy fëmijët e tyre, u vranë në një sulm ajror izraelit në një shtëpi të familjes “Al-Madhoun” në lagjen Al-Amal, në perëndim të Khan Younisit.
Një tjetër sulm ajror në një shtëpi të familjes “Jouda” në kampin e refugjatëve Nuseirat, në Gazën qendrore, la dy persona të vrarë, së bashku me të tjerë të plagosur.
Gjithashtu në Nuseirat, një burrë u vra, ndërsa pesë të tjerë u plagosën, përfshirë një foshnjë 1-muajshe, në një sulm ajror izraelit në një shtëpi të familjes “Al-Majdalawi”, raportoi gjithashtu Wafa.
Ushtria izraelite rifilloi sulmet e saj në Rripin e Gazës më 18 mars dhe që atëherë ka vrarë 3.747 persona dhe ka plagosur gati 10.600 të tjerë, duke shkelur një marrëveshje armëpushimi dhe shkëmbimi të të burgosurve që hyri në fuqi në janar.
Nëntorin e kaluar, Gjykata Ndërkombëtare Penale lëshoi urdhra arresti për kryeministrin izraelit Benjamin Netanyahu dhe ish-ministrin e tij të Mbrojtjes Yoav Gallant për krime lufte dhe krime kundër njerëzimit në Gaza.
Izraeli gjithashtu përballet me një padi për gjenocid në Gjykatën Ndërkombëtare të Drejtësisë për luftën e tij në enklavën palestineze.