Tabela vetëm në maqedonisht, anashkalohet gjuha shqipe në Dibër
Problemet me respektimin e përdorimit të dy gjuhëve në Republikën e Maqedonisë së Veriut janë ende të pranishme në disa qytete, edhe pse kjo e drejtë garantohet me Kushtetutë. Megjithëse përdorimi i gjuhës shqipe është i garantuar me ligj, ka raste kur kjo gjuhë vazhdon të anashkalohet, ndonjëherë edhe qëllimisht. Një rast i tillë ka ndodhur së fundmi në qendër të Dibrës, ku është vendosur një tabelë komunikacioni vetëm në gjuhën maqedonase.
Është me rëndësi të theksohet se në hyrje dhe dalje të qytetit të Dibrës, mbishkrimet janë të shkruara në të dy gjuhët zyrtare, maqedonisht dhe shqip. Megjithatë, në këtë rast të veçantë, në tabelën e përmendur mungon plotësisht gjuha shqipe. Pas konstatimit të kësaj shkeljeje, kërkuam sqarime nga disa institucione përgjegjëse për të kuptuar se kush e ka vendosur tabelën dhe pse nuk është respektuar dygjuhësia. Qytetarët kanë reaguar, por tabela vazhdon të qëndrojë në vendin e saj.
Në një deklaratë për gazetën Koha, kryetari i Këshillit Komunal, Fuat Spahiu, theksoi se ky problem duhet të hetohet nga inspektorati i tregut. “Patjetër duhet të ketë dygjuhësi”, tha Spahiu.
Për këtë çështje biseduam edhe me kryetarin e Komisionit për Siguri në Komunikacion pranë Komunës së Dibrës, Abdul Koleci.
“Këtu kompetente janë organet përkatëse. Nuk guxon që mbishkrimi të jetë vetëm në një gjuhë, në këtë rast vetëm në maqedonisht. Patjetër duhet të jetë edhe në gjuhën shqipe. Institucionet kompetente duhet të reagojnë”, theksoi ai.
Gjithashtu, qëndrimin e tij e dha edhe anëtari i Këshillit të Komunës së Dibrës, Bashkim Mashkulli, i cili është edhe kryetar i Shoqatës së të Burgosurve Politikë.
“Ky mbishkrim vetëm në një gjuhë është një provokim i pastër për dibranët. Ai që e ka vendosur – kushdo qoftë – duhet të kuptojë se gjuha shqipe duhet të jetë në të gjitha mbishkrimet, ashtu siç përcaktohet me ligj. Kërkoj që institucionet kompetente dhe inspektorët të reagojnë sa më shpejt dhe të vendosin përkthimin edhe në shqip,” deklaroi ai.
Tabela në fjalë është vendosur në sheshin “Skënderbeu”, vetëm disa metra larg bustit të heroit kombëtar Gjergj Kastrioti Skënderbeu, në qendër të Dibrës. Ndërsa po realizonim fotografi të tabelës me mbishkrimin “Mos e blloko udhëkryqin” (në maqedonisht), biseduam edhe me disa qytetarë të rastësishëm.
“Kjo që është vendosur është një provokim për shqiptarët. Institucionet harrojnë Kushtetutën dhe vendosin tabela në një gjuhë, kinse nga padija”, u shpreh M. T., 38 vjeç. Ndërsa E. F., një dibran i moshuar, gjithashtu dënoi vendosjen e tabelës vetëm në maqedonisht. “Dibra ka shumicë dërmuese shqiptare, dhe përdorimi i gjuhës shqipe është i garantuar me Kushtetutë dhe me ligj. Ky veprim duhet të dënohet si provokim,” na tha ai.
Tabela bie dukshëm në sy, dhe megjithëse ka pasur shumë reagime, ajo vazhdon të qëndrojë në vend, vetëm në një gjuhë.