Bashkimi Demokratik për Integrim ka shprehur shqetësim të thellë për mungesën e përfaqësimit të shqiptarëve në garën për Guvernator të ri të Bankës Popullore të Maqedonisë së Veriut, zgjedhje që pritet të ndodhë më 21 maj, transmeton Flaka
Sipas kësaj partie, në listën e ngushtë prej katër kandidatësh, nuk përfshihet asnjë shqiptar, çka sipas tyre nuk pasqyron aspak karakterin multietnik të shtetit. Ata theksojnë se kjo pozitë po trajtohet si pronë ekskluzive e maqedonasve etnikë, ndërsa askush nga strukturat politike dhe institucionale – përfshirë Qeverinë dhe Presidenten – nuk ka ngritur zërin për këtë çështje.
BDI kritikon faktin që as përfaqësuesit politikë shqiptarë brenda shumicës parlamentare nuk kanë insistuar që në listë të përfshihet të paktën një ekspert shqiptar i ekonomisë. “Ky vend ka me bollëk profesionistë shqiptarë të kualifikuar për këtë funksion,” thuhet në reagimin e kësaj partie.
“Fatkeqësisht, duket se sot nuk guxojmë as të pyesim për këto pozita – e lëre më të luftojmë për përfshirjen tonë në funksione kaq të larta shtetërore,” thuhet më tej në reagim.
Sipas BDI-së, kjo situatë është pasojë e një strategjie të qëllimshme përjashtuese nga ana e Kryeministrit, i cili ka krijuar një rreth të mbyllur etnik në Kabinetin e tij dhe në vendimmarrjen institucionale.
“Republika e Maqedonisë së Veriut është shtet i të gjithë qytetarëve të saj – pa dallim etnie apo përkatësie tjetër. Kushtetuta obligon përfaqësim të drejtë të të gjitha komuniteteve,” thekson BDI, duke i bërë thirrje Presidentes që të mos ndjekë thjesht kërkesat e Qeverisë, por të respektojë frymën e Kushtetutës dhe karakterin multietnik të vendit.
Ky reagim vjen në një moment të rëndësishëm për përfaqësimin institucional të shqiptarëve dhe ngre pikëpyetje të mëdha mbi barazinë në emërimet publike në nivele të larta shtetërore.