Nga 27 Prilli i 2017 te prilli i 2025: A po përsëritet historia?
Një status i publikuar së fundmi nga Berat Jakupi, nënkryetari i Aleancës për Shqiptarët nga krahu i Ziadin Selës, ka ngjallur debat dhe reflektim mbi zhvillimet politike të fundit në Maqedoninë e Veriut. Jakupi shkroi:
“Për ata që mendojnë se do të ketë déjà-vu të vitit 2017, dua t’ua rikujtoj se në prill të atij viti ndodhi 27 Prilli, ndërsa në prill të vitit 2025 ndodhi prishja e kontratës me ‘Gjoka Konstruksion’.”
Statusi vjen në një kohë kur Arben Taravari, kryetsari i krahut tjeter i Aleancës për Shqiptarët dhe pjesë e qeverisë, ka paralajmëruar largimin nga koalicioni qeveritar, duke e cilësuar këtë si një akt kombëtar. Sipas tij, shqiptarët nuk janë të përfaqësuar denjësisht dhe vendimet e rëndësishme po merren pa konsensus të gjerë.
Jakupi, duke iu referuar ngjarjeve të 27 Prillit 2017, kujton se ishte pikërisht Ziadin Sela dhe Aleanca për Shqiptarët që, me votat e tyre, ndihmuan në rrëzimin e regjimit të Nikolla Gruevskit. Gjatë sulmit të dhunshëm në Kuvend, Sela u rrah brutalisht dhe për pak sa nuk e humbi jetën — një çmim i rëndë për një vendim politik që ndryshoi rrjedhën e historisë së vendit.
Sot, tetë vjet më vonë, prishja e kontratës me kompaninë shqiptare “Gjoka Konstruksion” dhe tensionet brenda qeverisë, kanë ringjallur shqetësimet për mënyrën se si trajtohen interesat e shqiptarëve në qeverisje.
Mesazhi i Jakupit është më shumë se simbolik — është një paralajmërim se historia nuk duhet të harrohet, dhe se kujdesi për të mos e përsëritur gabimet e së kaluarës është më i nevojshëm se kurrë.