Presidenti i Federatës së Basketbollit të Maqedonisë së Veriut, Pero Antiç, po përballet me thirrje të fuqishme për dorëheqje pas një sërë veprimesh të cilësuara si anti-shqiptare dhe diskriminuese ndaj klubeve shqiptare. Reagimi vjen si pasojë e sjelljes së tij publike, përfshirë deklarata fyese ndaj shqiptarëve dhe urdhërime që dyshohet se kanë ndikuar në penalizimin e ekipeve shqiptare në garat zyrtare.
Indinjata publike u rrit edhe më shumë pas publikimit të një fotografie të Antiçit me Milorad Dodikun, liderin e entitetit serb të Bosnjë dhe Hercegovinës, i cili është në listën e zezë të Departamentit Amerikan të Shtetit për veprime që minojnë stabilitetin, demokracinë dhe marrëveshjen e paqes në rajon.
Kjo lidhje ka ngjallur reagime të forta në opinionin publik shqiptar në Maqedoninë e Veriut, ku Antiç akuzohet se nuk përfaqëson vlerat e barazisë dhe bashkëjetesës që duhet të karakterizojnë sportin. Klube shqiptare raportojnë për presion, trajtim të pabarabartë dhe përpjekje të qëllimshme për t’i penguar në mënyrë institucionale.
“Si mund të pranohet një drejtues sportiv që pozon me figura të sanksionuara nga SHBA dhe njëkohësisht nxit diskriminim ndaj shqiptarëve?”, thuhet në një nga reagimet e përfaqësuesve të klubeve shqiptare.
Ky skandal vjen në një moment kur tensionet etnike dhe politike po reflektohen gjithnjë e më shumë edhe në sport, duke ngritur pikëpyetje serioze mbi paanshmërinë e institucioneve sportive në vend.