Drejtori i të ashtuquajturës Zyre për Kosovë në Qeverinë e Serbisë, Petar Petkoviq, ka thënë se është inkurajues reagimi i fundit që ka bërë ambasadori amerikan në Kosovë, Jeffrey Hovenier, i cili ka akuzuar autoritetet e Kosovës se po nxisin tensione ndëretnike.
Hovenier madje ka përmendur edhe mundësinë e mosmbështetjes amerikane për Kosovën në arenën ndërkombëtare.
“Qeveria e Shteteve të Bashkuara të Amerikës është thellësisht e shqetësuar për veprimet e fundit të autoriteteve të Qeverisë së Kosovës që kanë ndikim direkt dhe negativ në pjesëtarët e etnisë serbe dhe minoritetet tjera në Kosovë. Këto veprime janë duke rritur në mënyrë të panevojshme tensionet ndëretnike dhe si pasojë kufizojnë opsionet që Shtetet e Bashkuara të shërbejnë si avokuese efektive për Kosovën në arenën ndërkombëtare”, thuhet në deklaratën e Hovenierit, të publikuar të shtunën në mbrëmje në platformën “X”.
Hovenier ka përmendur “mbylljen e objekteve të institucioneve të administruara nga Serbia në Dragash, Pejë, Istog e Klinës si dhe zyrën e një organizate joqeveritare në Prishtinë”.
E Petkoviq ka thënë se është inkurajues reagimi i Hovenierit.
“Sigurisht se Amerika s’do ta ndryshojë politikën e saj ndaj të ashtuquajturës Kosovë e M. të pavarur. Por, në këtë rast, kur është fjala për heqjen e dinarit, që po krijon një fatkeqësi humanitare në rrethinat serbe në Kosovë e M. shohim një reagim tjetër”, ka thënë Petkoviq në intervistë për “RTS”.
Petkoviq ka thënë se Serbia të hënën do të kërkojë që të mbahet mbledhje e jashtëzakonshme e Këshillit të Sigurimit të OKB-së.
Ai ka akuzuar palën kosovare se “nuk është për dialog” dhe e ka kërkuar sërish zbatimin e asociacionit të komunave me shumicë serbe.