Derisa autoritetet e komunave nuk merren vesh për lokacionin, nga ana tjetër rastet e kafshimit të qytetarëve nga qentë endacak shënojnë rritje
Urim HASIPI
Gostivar, 4 shkurt – Problemi me qentë endacak vazhdon të mos gjejë zgjidhje. Ky fenomen akoma vazhdon të jetë shqetësues edhe për qytetarët e Gostivarit dhe jo vetëm. Këta qen endacak tashmë gjithnjë hasen nëpër rrugë ku frekunetojnë të gjitha moshat dhe kjo e bën këtë ende më alarmante situatën në këtë qytet. Të dhënat e Sektorit për Punë të Brendshme në Tetovë tregojnë se numri i sulmeve nga qentë endacak është trefishuar gjatë vitit 2023, krahasuar me vitin 2022. Kështu gjatë vitit të kaluar (2023) në territorin e komunës së Gostivarit janë regjistruar 94 sulme nga qentë e pastrehë. Prej tyre, 63 sulme janë regjistruar në qytetin e Gostivarit, kurse pjesa tjetër e sulmeve kanë ndodhur nëpër fshatra. Marrë për bazë këto shifra, tashmë qytetarët ndjehen të rrezikuar kur lëvizin në qytet, në parqe apo vende tjera. Situata më e rëndë paraqitet në orët e mbrëmjes dhe në mëngjes, kur turma qensh hasen në rrugë dhe në rrezik më shumë janë fëmijët që shkojnë ose kthehen nga shkolla. Në ndërkohë, nuk mungojnë rastet kur qytetarët postojnë në rrjetet sociale tufë me qen të pastrehë që qarkullojnë në rrugët kryesore ose periferike të Gostivarit.