Në një prononcim të drejtpërdrejtë në një emision televiziv, Dritan Goxhaj ka shpërthyer në akuza të forta ndaj Arben Taravarit, duke e cilësuar atë si një “parazit politik” që ka vegjetuar dhe shfrytëzuar partitë politike për përfitime personale.
“Zoti Taravari është pikërisht ai lloj paraziti politik që hyn në forca politike, i militarizon ato dhe në momentin që nuk merr më asgjë, largohet për të kërkuar përfitim diku tjetër,” u shpreh Goxhaj.
Ai shtoi më tej se Taravari nuk do të mund të fitojë as në bastionin e tij politik pa ndihmën e figurave si Ziadin Sela apo Ali Ahmeti. “Nëse nesër del vetëm në zgjedhjet lokale për të marrë komunën e Gostivarit, ai nuk fiton. I duhet patjetër ose Ziadin Sela ose Ali Ahmeti,” theksoi Goxhaj.
Këto deklarata vijnë në një moment tensionesh të larta politike dhe përplasje të forta brenda dhe mes partive shqiptare në Maqedoninë e Veriut.