Kryetari i Partisë Demokratike të Kosovës, Memli Krasniqi tha se në rast se dështon Albin Kurti që ta formojë Qeverinë, janë të gatshëm që me opozitën dhe me komunitetet joshumicë të fillojnë bisedimet dhe të formojnë institucionet e vendit, që siç tha, me Bedri Hamzën kryeministër, transmeton in7. I pyetur se a to të kishte bashkëpunim me Listën Serbe, Krasniqi tha se me Listën Serbe jo, por me komunitetet e tjera joshumicë.
“Unë ju kam thënë gjithmonë, ne në asnjë mënyrë nuk do të luajmë rol bllokues. Ne kërkojmë sot me vazhdu seanca nëse zotëri Kurti jep dorëheqje edhe me shku tutje. Neve na duhet me konstituu Kuvendin, me zgjedhë kryetarin, nënkryetarët dhe pastaj me hy në procesin kushtetues. Jam i bindur prej kësaj që po e shoh sot me 52 vota që Kurti nuk mund ta bëjë Qeverinë. Ne jemi të gatshëm në rastin e dështimit të tij, që menjëherë me marr përgjegjësinë me partitë që kanë qenë në të kaluarën në opozitë dhe me komunitetet pakicë të Kosovës që ta bëjmë Qeverinë e re”, tha Memli Krasniqi