Inspektorati Shtetëror Sanitar Shëndetësor (ISSHSH) dhe ekipi i Ministrisë së Shëndetësisë do të konstatojnë nëse ka pasur gabim në trajtimin e pacientit Vedat Ademi, i cili ndërroi jetë në Spitalin e Përgjithshëm të Kumanovës. Për këtë rast, familjarët thonë se i është dhënë terapi që i shkaktoi reagim alergjik, transmeton Portalb.mk.
Ministri i Shëndetësisë, Arben Taravari, në konferencë për shtyp sot deklaroi se do të ketë përgjegjësi nëse ka neglizhencë mjekësore.
“Për pacientin nga Kumanova jam njoftuar që dje. Për të qenë i sinqertë, shoku anafilaktik ndodh kudo dhe mund të ndodhë në çdo kohë. Fatkeqësisht, ndonjëherë shoku anafilaktik mund të përfundojë me vdekjen e pacientit. Sipas informacionit që kam, pacienti ka pasur shok anafilaktik ndoshta është ditur ose ndoshta nuk dihej për donjë ilaç të caktuar, donjë ilaç që pacienti mund të ketë marrë më parë dhe të mos ketë reaguar menjëherë, duke bërë që trupi të ketë një reagim imunitar.”tha Taravari.
Ai tha se në Spitalin e Kumanovës është Inspektorati Sanitar Shtetëror si dhe do të shkojë ekipi profesional i Ministrisë së Shëndetësisë për të parë të gjitha detajet.
“Nëse ka neglizhencë mjekësore, sigurisht që do të ketë përgjegjësi”, tha Taravari.
Kujtojmë se 32 vjeçari Vedat Ademi nga Kumanova ka ndërruar jetë në Spitalin e Përgjithshëm të Kumanovës më 17 mars. Ai paraprakisht kishte ardhur për kontroll pasi është ankuar për probleme me stomakun. Portalb.mk bisedoi me Amet Ademin babain e 32-vjeçarit të ndjerë Vedat Ademi dhe Sead Ademin vëllaun e të ndjerit, ata thonë se i është dhënë ilaç ndaj të cilit ishte alergjik, dhe se për këtë fajësojnë mjekun i cili ishte kujdestar.
Drejtori i Spitalit, Stefan Trajanovski pranoi se i është dhënë terapi, por se në vend të përmirësimit ai ka pasur dhimbje në gjoks pas çka ka ndërruar jetë. Policia konfirmoi rastin, dhe deklaroi se pas urdhrit të prokurorit, trupi i pajetë është dorëzuar për obduksion dhe presin rezultatet.