Bashkimi Demokratik për Integrim tha se, komuna e Çairit është shndërruar në një vend të rrezikshëm për të jetuar dhe për të rritur fëmijët, që siç thotë, qytetarët marrin kërcënime të drejtpërdrejta për jetën nga kaosi urban, përcjell Tv21. BDI tha se, kjo situatë në Çair është si rezultat i neglizhencës së kryetarit të komunës, që siç thotë, ka zhdukur çdo ndjenjë përgjegjësie dhe llogaridhënieje.
“Çairi është bërë një vend i rrezikshëm për të jetuar dhe për të rritur fëmijët. Përveç kaosit urban, betonizimit dhe papastërtisë, tashmë edhe kabllot elektrike të rëna për tokë përbëjnë një kërcënim të drejtpërdrejtë për jetën e qytetarëve, veçanërisht të fëmijëve. Kjo situatë është rezultat i drejtpërdrejtë i neglizhencës së kryetarit të Komunës, Visar Ganiu, i cili, në vend që të kujdeset për sigurinë e banorëve, ka zhdukur çdo ndjenjë përgjegjësie dhe llogaridhënieje. Qytetarët tashmë po e kërkojnë atë tek “njerëzit e humbur”, sepse ai dhe klika që e kontrollon atë, kanë shndërruar Çairin në një komunë të pamenaxhueshme, përmes korrupsionit masiv dhe shpërfilljes totale ndaj problemeve të përditshme të qytetarëve”, thotë BDI.