BDI sot përmes një kumtese i ka kujtuar VLEN-it se opinioni pret përgjigje për deklaratën e zv. kryeministri Stoilkoviq.
Stoilkoviq disa javë më parë deklaroi publikisht se dy herë ka shpëtuar VLEN-in nga turpërimi para opinionit.
“Për dy javë me radhë, publiku pret një reagim nga VLEN-i: çfarë kanë neglizhuar apo tradhtuar ata, që edhe një eksponent i botës serbe ka qenë i detyruar t’i shpëtojë nga dështimi?
Shqiptarët meritojnë përgjigje.
Apo mos vallë skandalet e korrupsionit që po dalin në dritë për ministrat e tyre i kanë hutuar aq shumë, sa tashmë, përveç se udhëheq Ministrinë për Zbatimin e Marrëveshjes së Ohrit, Stoilkovic qenka bërë edhe përgjegjës për çështjen shqiptare në Maqedoninë e Veriut?
BDI-ja dënon këtë situatë të turpshme dhe të rrezikshme për përfaqësimin e shqiptarëve.
Është e qartë se VLEN-i nuk ka as autonomi politike, as integritet e as legjitimitet për të mbrojtur interesat e shqiptarëve, duke u bërë peng i skandaleve dhe i agjendave të huaja”, thuhet në kumtesën e BDI-së.