Agjencia Kombëtare e Inteligjencës turke (MIT) kapi në Siri terroristin Temir Dükancı, një nga autorët e sulmit terrorist ku humbën jetën 53 persona në rajonin Reyhanlı në qytetin Hatay të Türkiyes në vitin 2013, raporton Anadolu.
Sipas informacioneve të marra nga burime të sigurisë, MIT identifikoi se Dükancı i cili ka ndihmuar në sjelljen e eksplozivëve të përdorur në sulmin terrorist në Türkiye nga deti dhe sigurimin e automjeteve për transportin e eksplozivëve, ndodhej në Siri.
Është konstatuar se Dükancı po përgatitej të largohej në Liban dhe se me anëtarët e organizatës që do të mblidhte këtu planifikonte të kryente sulm kundër përfaqësive të Türkiyes jashtë vendit dhe se kërkonte një pasaportë false për këtë qëllim.
Dükancı është në kategorinë portokalli të Listës së Terroristëve të Kërkuar. Ai u kap në operacionin e kryer nga MIT në kufirin Siri-Liban dhe u soll në Türkiye. Terroristi Dükancı iu dorëzua Departamentit të Policisë në qytetin Hatay.
Në vitin 2018, MIT e kapi në Siri dhe e solli në Türkiye, Yusuf Nazik një nga autorët e sulmit terrorist ndërsa në janar 2025 kapi Muhammed Dib Koralı.