Presidenti amerikan, Donald Trump, beson se Rusia i ka “kartat” në çfarëdo negociate për paqe për t’i dhënë fund luftës në Ukrainë, sepse ajo “ka marrë shumë territor”.
Kreu i Shtëpisë së Bardhë i tha televizionit BBC se Moska dëshiron që ta shohë fundin e luftës, të cilën Rusia e nisi para gati tri vjetëve, në shkurtin e vitit 2022.
“Unë mendoj se rusët duan ta shohin fundin e luftës, vërtet mendoj kështu. Mendoj se ata i kanë kartat paksa, sepse kanë marrë shumë territor. Ata i kanë kartat” – i tha ai BBC-së gjatë një fluturimi në aeroplanin zyrtar “Air Force One”.
Kur u pyet se a beson që Rusia dëshiron paqe, Trumpi tha “po”.
Republikani foli pas një sulmi me fjalë ndaj presidentit ukrainas, Volodymyr Zelensky, të cilin e quajti “diktator që ka bërë një punë të tmerrshme”.
Një zyrtar i Shtëpisë së Bardhë tha se shkrimi i Trumpit në rrjetin “Truth Social” ishte kundërpërgjigje e drejtpërdrejtë ndaj komenteve të Zelenskyt, i cili më herët tha se presidenti amerikan po jeton në një “fluskë desinformatash”, pasi kreu i Shtëpisë së Bardhë kishte pretenduar se popullariteti i presidentit ukrainas ka rënë në 4 për qind në mesin e popullit të Ukrainës.
“Ai refuzon që të ketë zgjedhje. Ai është poshtë në sondazhet e vërteta ukrainase. Si mund të jesh lart, kur secili qytet po shkatërrohet” – tha Trumpi në Florida, duke iu referuar homologut ukrainas./Nacionale