Arabia Saudite tha se nuk do të vendosë lidhje me Izraelin pa formimin e një shteti palestinez, duke dalë kundër pretendimit të presidentit amerikan, Donald Trump, se Riadi nuk është duke kërkuar një atdhe palestinez, kur tha se ShBA-ja dëshiron që ta marrë përsipër Rripin e Gazës.
Në një njoftim shokues, Trumpi tha të martën se Shtetet e Bashkuara do ta marrin përsipër enklavën e rrënuar nga lufta, pasi palestinezët të jenë vendosur në një vend tjetër dhe se do ta zhvillojë Gazën ekonomikisht. Ai foli në një konferencë të përbashkët për gazetarë me kryeministrin izraelit, Benjamin Netanyahu, raporton agjencia e lajmeve “Reuters”.
Të mërkurën, Ministria e Punëve të Jashtme e Arabisë Saudite tha se ky shtet kundërshton çfarëdo përpjekje për t’i zhvendosur palestinezët nga toka e tyre dhe se qëndrimi i Riadit ndaj palestinezëve është i panegociueshëm.
Princi i Kurorës, Mohammed bin Salman, e ka mohuar pozicionin e Mbretërisë në “mënyrë të qartë e të hapur” se nuk lejon asnjë interpretim në asnjë rrethanë, thuhet më tej në deklaratë.
Shtetet e Bashkuara për disa muaj kanë bërë përpjekje diplomatike që ta bindin Arabinë Saudite, njëri nga shtetet më të fuqishme dhe më me ndikim në botën arabe, që t’i normalizojë marrëdhëniet me Izraelin dhe që ta njohë këtë shtet. Megjithatë, lufta në Gaza, që nisi në tetorin e vitit 2023, e nxiti Riadin që ta vendoste në sirtar këtë çështje pas zemërimit arab rreth ofensivës ushtarake izraelite.
Vendosja e marrëdhënieve me Arabinë Saudite do të ishte arritje e madhe për Izraelin, sepse Mbretëria ka ndikim të gjerë në Lindjen e Mesme, në botën më të gjerë myslimane dhe është eksportuesja më e madhe e naftës në botë.
Trumpi do të donte që Arabia Saudite t’i ndiqte hapat e Emirateve të Bashkuara Arabe dhe Bahreinit, vende që më 2020 i nënshkruan ato që njihen si Akordet e Abrahamit dhe i normalizuan lidhjet me Izraelin.