Shefi i NATO-s Mark Rutte thotë se tensionet midis Evropës dhe Shteteve të Bashkuara mbi çështjet tregtare nuk do të ndikojnë te NATO.
Duke folur me gazetarët në Bruksel të hënën, Rutte hodhi poshtë gjithashtu çdo nocion se Evropa mund të braktisë marrëdhëniet e saj të sigurisë me SHBA.
Sekretari i Përgjithshëm i NATO-s tha se një strategji evropiane e mbrojtjes pa Uashingtonin nuk do të funksiononte.
“Ne duhet të qëndrojmë të bashkuar,” u tha Rutte gazetarëve, duke përmendur “kërcënimet” gjeopolitike, përfshirë Rusinë.
“Gjëja më e mirë që Perëndimi mund të bëjë është të qëndrojë i bashkuar dhe unë e di se i njëjti mendim është ende i përhapur në SHBA, përfshirë Shtëpinë e Bardhë,” shtoi ai.
Rutte i bëri komentet pasi Trump ka akuzuar shpesh partnerët e Uashingtonit në NATO se nuk shpenzojnë mjaftueshëm për mbrojtjen dhe kërcënoi se nuk do t’i mbrojë ata në rast sulmi.
Shumë anëtarë evropianë të bllokut kohët e fundit kanë lëvizur për të rritur shpenzimet e tyre të mbrojtjes në 2 përqind të prodhimit të tyre të brendshëm bruto (GDP), rekomandimi aktual minimal i NATO-s. Megjithatë, Trump kërkoi një rritje të madhe muajin e kaluar, duke bërë thirrje për shpenzimin e 5 për qind të PBB-së së tyre.
Trump ka tronditur disa nga partnerët më të afërt të Uashingtonit duke njoftuar tarifa prej 25 për qind mbi importet nga Kanadaja anëtare e NATO-s dhe duke kërcënuar se do të bëjë të njëjtën gjë me Bashkimin Evropian.
SHBA-ja, e cila shpenzoi gati 850 miliardë dollarë për mbrojtjen vitin e kaluar, është fuqia më e madhe ushtarake në NATO.
Uashingtoni, i cili ka trupa të stacionuara në të gjithë Evropën, ka luajtur gjithashtu një rol të madh në ofrimin e ndihmës ushtarake dhe financiare për Ukrainën për të ndihmuar në zmbrapsjen e pushtimit rus atje.
Por Trump ka vënë në pikëpyetje më parë angazhimin e SHBA ndaj politikës së mbrojtjes kolektive të NATO-s, e cila thotë se një sulm ndaj një anëtari të aleancës është një sulm ndaj të gjithë anëtarëve.
Menjëherë pas fillimit të mandatit të tij të dytë më 20 janar, Trump ngriu pothuajse të gjithë ndihmën e huaj si pjesë e agjendës së tij “Amerika e para”, duke ndalur miliarda dollarë financime globale, një lëvizje që mund të ndikojë në financimin për Ukrainën.
Në krye të kërcënimeve tregtare dhe shkurtimeve të ndihmës, Trump ka kërcënuar gjithashtu Danimarkën anëtare të NATO-s duke u zotuar të marrë kontrollin e Grenlandës, një territor danez i vetëqeverisur.