Komuna e Tetovës vazhdon të mbajë numrin më të lartë të shpërnguljeve të nxënësve edhe këtë vit. Mbii 70 nxënës kanë marrë fletë-shpërngulje nga shkollat fillore dhe të mesme në këtë qytet . Sipas Sektorit të Arsimit pranë Komunës së Tetovës, megjithëatë ky trend është në ulje krahasuar me vitin e kaluar.
“57 nxënës kanë kërkuar shpërngulje nga shkollat fillore dhe 17 nga shkollat e mesme. Krahasuar me vitin e kaluar, kur numri ishte 130, kemi një ulje të ndjeshme, dhe presim që ky trend të vazhdojë të bjerë falë investimeve në shkollat e Tetovës,” deklarojnë nga Sektori i Arsimit.
Edhe Komuna e Bogovinës ka regjistruar një numër shpërnguljesh, megjithëse numri i nxënësve atje është ulur ndjeshëm. Gjysmëvjetori i dytë pritet të fillojë me dhjetë nxënës më pak.
“Dhjetë nxënës kanë kërkuar fletë-shpërngulje në të gjithë territorin e Komunës së Bogovinës, me shumicën e kërkesave që vijnë nga vendbanimet malore,” njoftojnë nga Komuna e Bogovinës.
Ndërkohë, Komuna e Gostivarit nuk ka dhënë një numër të saktë, por sipas përgjegjëses së Sektorit të Arsimit, Aslian Snopçe, trendi është në ulje dhe pritet të vazhdojë kështu edhe në të ardhmen.
“Nuk kemi ende informacione të plota. Këto të dhëna do t’i kompletojmë në ditët në vijim. Megjithatë, sipas informacioneve paraprake, trendi është në ulje dhe shpresojmë që ky numër të zvogëlohet edhe më tej,” tha Snopçe.
Ndryshe nga komunat e tjera, Vrapçishti rezulton të ketë ndaluar plotësisht shpërnguljet. Për më tepër, kjo komunë rezulton të jetë e vetmje në të cilën ka nxënës që janë kthyer nga mërgimi në vendlindje. /tvklan.mk