Njëmbëdhjetë fëmijë janë lënduar dhe janë pranuar në spitalin e qytetit në Shkup pas një sfide të re në rrjetin social TikTok, ndërsa dy prej tyre kanë fraktura në duar, konfirmoi për MIA ushtruesi i detyrës së drejtorit të Klinikës për Sëmundje Kirurgjikale “Shën Naum Ohri”, dr. Nebojsha Nastov.
Siç theksoi ai, fëmijët janë të moshës 10 deri në 16 vjeç dhe të gjithë janë nga Shkupi.
– Njëmbëdhjetë fëmijë janë pranuar në spital deri dje në orën 13:00. Është e mundur që të ketë edhe më shumë fëmijë, por ky është informacioni që ne kemi për mekanizmin e lëndimit – deklaroi Nastov për MIA.
Në një pyetje nga gazetarët për natyrën e sfidës, ai shpjegoi se bëhet fjalë për një lojë ku fëmijët hedhin njëri-tjetrin në ajër me krahët shtrirë, duke imituar “Supermenin”.
– Zgjaten krahët siç bën personazhi “Supermen”. Grupi e kap dhe e hedh në ajër djalin apo vajzën që merr pjesë në sfidë. Kjo është ajo që më kanë shpjeguar. Nuk e kam parë vetë dhe nuk mund të them me siguri. Janë të përfshirë si djem, ashtu edhe vajza – shtoi Nastov.
Ai apeloi që sfida të tilla të mos përsëriten në të ardhmen, pasi mund të përfundojnë me pasoja serioze.
– Për fat, nga këta 11 fëmijë, dy kanë vetëm fraktura në duar, ndërsa të tjerët kanë mavijosje. Por, nëse kjo vazhdon, mund të ndodhin lëndime më të rënda. Nëse një fëmijë bie me kokë, do të ketë pasoja shumë më të rënda – shtoi Nastov.