Sot u mbajt seanca e radhës për të vendosur mbi çështjen e vulave të partisë “Aleanca për Shqiptarët”, por vendimi përfundimtar nuk u mor pasi gjykatësi shtyu seancën për më 13 dhjetor. Në seancë, avokati që përfaqëson krahun e Arben Taravarit akuzoi palën tjetër për mosrespektim të statutit të partisë. Ai pretendoi se kryesia qendrore kishte marrë vendime në mënyrë të kundërstatutar, duke argumentuar se shumica nuk ishin të njoftuar.
Ndërkohë, për muaj të tërë, krahu i udhëhequr nga Ziadin Sela ka akuzuar Taravarin për shkeljet statutare të partisë. Sela më herët ka theksuar se kryesia qendrore është organi që thërret kongresin, dhe sipas tij, në kongresin e mbajtur pak para zgjedhjeve, ai u zgjodh kryetar me shumicën e votave nga delegatët.
Krahu i Selës pyesin se me çfarë nënshkrimesh pala tjetër ka thirrur kongres, duke qenë se, sipas statutit, kongresin mund ta thërrasë vetëm kryesia qëndrore, dhe ky proces, sipas tyre, është ndjekur saktësisht nga krahu i Selës, kurse Taravari vetëm po bën farse.
Me shtyrjen e vendimit, çështja e vulave të partisë “Aleanca për Shqiptarët” mbetet e hapur dhe pritet që të dyja palët të vazhdojnë përplasjet deri në seancën e ardhshme.