Universiteti i Prishtinës ka realizuar një hulumtim ku rreth 41 për qind e studentëve kanë deklaruar se janë ngacmuar seksualisht apo kanë njohuri të rasteve të ngacmimeve seksuale nga profesorët. Por ky hulumtim nuk iu është kumtuar studentëve nga menaxhmenti i UP-së. E, kjo është vlerësuar nga studentët si tentim për fshehje të të dhënave dhe ikje të përgjegjësisë.
10.4% e studentëve janë ngacmuar seksualisht në hapësirat akademike të Universitetit të Prishtinës nga profesorët, është një nga gjetjet e hulumtimit të nisur nga menaxhmenti para një viti e gjysmë.
E, 31 për qind e studentëve raportuan se kanë parë ose kanë dëgjuar për rastet e ngacmimeve seksuale në kampus. Në hulumtim janë përfshirë 1 mijë studentë, nga 19 mijë sa numëron gjithsej UP-ja.
Menaxhmenti i UP-së nuk i ka kumtuar këto të dhëna para studentëve dhe as nuk ka mbajtur konferencë për media për këtë çështje. Hulumtimi u përmend në një ngjarje të institucioneve e organizatave vendore e ndërkombëtare.
Anita Mjeku, nga Lëvizja Feministe Studentore, këtë e sheh si tentim për të fshehur të dhënat e hulumtimit.
“Hulumtimi ka dalë pak si fshehtas, pak si me i fshehë të dhënat, e janë duke e bërë atë që UP-ja e bën në vazhdimësi, me i ikë përgjegjësisë që e ka për mbrojtjen e vajzave dhe grave brenda kampusit të Universitetit të Prishtinës…E çka është shqetësuese këtu, është që të dhënat që janë dalë, përveçse nuk dalin me u kumtua prej Universitetit të Prishtinës, tjetër është që tash unë mendoj që neve është dashur të na prezantohet edhe metoda se si është bërë hulumtimi”, ka thënë Mjeku.
Hulumtimi i cili është filluar nga menaxhmenti i UP-së për të krijuar politika afirmative mbështetëse për studentë, tani ka autorësinë e ish-prorektores, Njomza Llullaku, dhe jo të institucionit.
Për këtë rektori Arben Hajrullahu, i cili në shpalosjen e planit të tij qeverisës nuk e ka përmendur luftimin e ngacmimeve seksuale, nuk pranoi të flasë, përkundër pritjes së ekipit të KOHËS për tri orë para zyrës së tij.
Muaj më parë, 27 studente e akuzuan profesorin tashmë të suspenduar Xhevat Krasniqi për ngacmim seksual, ndërsa vitin e kaluar ish-profesori Bekim Bejta u raportua për ushtrim të dhunës psikike ndaj studentëve ndër vite.
E, një profesor dhe një asistent në Fakultetin e Edukimit u denoncuan nga një studente për ngacmim, por rasti i tyre u shua nga Këshilli i Etikës, pa treguar dëshmitë që kanë çuar deri te shuarja e procedurës.