Prej ditësh, pjesa më e madhe e Lindjes së Mesme ka mbajtur në mënyrë metaforike frymën e saj, duke e ditur se një sulm mund të ndodhë në çdo kohë.
Pothuajse një javë ka kaluar që kur Irani kreu një sulm masiv me raketa balistike ndaj Izraelit, si hakmarrje për vrasjet e fundit të liderëve të Hezbollahut dhe të krahut politik të Hamasit, shkruan BBC.
Pas sulmit, Izraeli u zotua menjëherë se do ta detyronte Republikën Islamike “të paguajë një çmim të rëndë”.
Kur dhe si do të sulmojë Izraeli Iranin?
Vonesa është pjesërisht për shkak të diskutimeve, si brenda strukturës ushtarake dhe politike izraelite, gjithashtu edhe me aleatin e ngushtë të Izraelit, SHBA-në.
Këto nuk kanë të bëjnë vetëm me shënjestrimin, duke filluar nga instalimet e naftës, bazat e Gardës Revolucionare, fabrikat e raketave balistike dhe objektet e kërkimit bërthamor – por edhe për efektin e mundshëm dhe reagimin e Iranit.
Siç raportohet, gjëja e fundit që dëshiron Shtëpia e Bardhë është një tjetër luftë në shkallë të gjerë që përfshin forcat amerikane vetëm një muaj para zgjedhjeve presidenciale.
As nuk dëshiron të shohë rritje të çmimeve të naftës – gjë që nuk do të ndikonte mirë te votuesit amerikanë.
Për sa i përket kohës, shumë kanë pritur që kundërsulmi i Izraelit të ndodhte sapo festa e Vitit të Ri hebre të përfundonte.
Të tjerë e presin në njëvjetorin e luftës në Gaza.