Kryetari i Lidhjes së Sindikatave të Maqedonisë, Sllobodan Trendafillov, kërkon takim me kryeministrin Hristijan Mickoski dhe ministrat kompetentë, në të cilin ndër të tjera do të diskutohet edhe për rritjen e pagës minimale. Ai pret që dialogu social të zhvillohet sa më shpejt dhe nëse kjo nuk ndodh, paralajmëron masa të tjera.
“Qeveria premtoi se në 100 ditët e para do të ulet me LSM-në për të diskutuar këtë çështje të rëndësishme për të gjithë punëtorët në vend. Kjo çështje e rëndësishme nënkupton rritjen e pagës minimale në të paktën 450 euro. Shporta minimale sindikale e llogaritur nga LSM-ja duhet t’i largojë dilemat e të gjithë ekspertëve, përfaqësuesve të Qeverisë, punëdhënësve në sektorin privat se situata në Maqedoni nuk është reale. Shporta minimale sindikale, të cilën e llogarisim sipas metodologjisë së re nga dhjetori, është rritur për 4600 denarë, ndërsa inflacioni në Maqedoni për 6 muajt e parë është 3,65%”, tha Trendafillov.