Kryeministri i Kosovës, Albin Kurti, udhëtoi drejt Shteteve të Bashkuara të Amerikës, ku do të marrë pjesë në Konventën Kombëtare Demokratike, e cila nis sot dhe zhvillohet në Çikago.
Kryeministri Kurti do të jetë pjesëmarrës dhe në një panel diskutimi me titull “Konventa Kombëtare Demokratike dhe Roli i Partive Politike”.
Paneli do të hapet nga kryesuesi i bordit drejtues të NDI, Tom Daschle, dhe do të moderohet nga Presidentja e NDI, Tamara Wittes, e ku ndër të tjerë pjesë e panelit do të jetë dhe ish-Sekretari i NATO-s, Lord George Robertson dhe Donna Brazile, ish-drejtuese e Komitetit Kombëtar Demokrat dhe tashmë pjesë e bordit të NDI.
Përgjatë qëndrimit në ShBA, Kryeministri do të ketë edhe takime të ndryshme bilaterale.
Ambasadori i Shteteve të Bashkuara të Amerikës, Jeffrey Hovenier, ditw mw parw ka bërë të ditur se kryeministri Albin Kurti merr pjesë në Konventën Kombëtare Demokratike dhe se nuk udhëton në SHBA me ftesë të qeverisë amerikane.
Këtë ai e tha në bashkëbisedimin që pati sot për Radio Evropa e Lirë, ndërsa u pyet për të konfirmuar prezencën e Kurtit në atë ngjarje.
”Sa e di unë, kryeministri Kurti planifikon të marrë pjesë në Konventën Kombëtare Demokratike me ftesë të Institutit Kombëtar Demokratik (NDI – National Democratic Institute). Por, të jemi të qartë, kjo nuk është ftesë nga Qeveria amerikane”./Lajmi.net/