Pas lajmeve në disa portale se babai i Blerim Bexhetit ishte pjesë e UDB-së ka reaguar Artan Grubi nga BDI ku tha se, në aspektin kombëtar, për Blerim Bexhetin nuk ka asgjë për kontestim dhe për Arban Taravarin tha se, në vend që të zhduket nga skena politike, akuzon Blerim Bexhetin.
“Ai që thotë që lufta e vitit 2001 nuk ka qenë luftë dhe e quan luftën gabim, që tradhëton partinë e vet, që kërcen nga prehëri në prehër, që poshtëroi popullin e vet duke pranuar rolin e servilit, vazalit, puthadorit, në vend se të struket e zhduket nga skena publike e ta ndërpres këtë dëm epokal kombit dhe të drejtave tona, paska akuzuar Blerim Bexhetin sot, edhe atë imagjinoni, në kontekst kombëtar.
Çdo fjalë e shqiptuar nga ju është gënjeshtër, çdo vepër e juaja është tradhëti! Unë dhe Blerimi vërtet kemi dallimet tona për shumë gjëra në politikë, por, në aspektin kombëtar nuk ka asnjë hapësirë për kontestim. Shpifjet e juaja të përditshme e të gërditshme si dhe gjuetia e shtrigave nga mungesa e të arriturave dhe kredibilitetit, nuk ua fshijnë vulën e tradhëtisë në ballë”, tha Grubi.