Një autobus i Ndërmarrjes së Transportit Publik “Shkupi” është djegur sot në bulevardin “Hristijan Todorovski-Karposh” në Komunën e Butelit. Informacionin për “360 gradë” e ka konfirmuar drejtori i NTP “Shkup”, Dragi Kushovski.Ai thotë se në autobus nuk ka pasur pasagjerë në momentin që ka rënë zjarri.
Sipas Kushovskit, autobusi fillimisht është prishur, më pas është thirrur shërbimi i kompanisë, por në momentin që ka mbërritur, automjeti ka marrë flakë. Sipas informacioneve jozyrtare, autobusi ka marrë flakë për shkak të defektit në instalimin elektrik.
Drejtori thotë se rasti është duke u hetuar nga Ministria e Punëve të Brendshme dhe se duhet pritur raporti zyrtar për shkakun e zjarrit të autobusit. Nga Njësia Territoriale e Zjarrfikësve të Qytetit të Shkupit konfirmojnë se me një veturë kanë intervenuar dhe kanë fikur zjarrin në autobusin e djegur të NTP-së në kryqëzimin e bulevardit “Hristijan Todorovski-Karposh” me rrugën “Ferid Bajram” në lagjen Butel.
Autobusi që u dogj sot është një nga autobusët e zakonshëm njëkatësh që janë sjellë nga Ukraina. Ndryshe, ky është autobusi i dytë i NTP “Shkupi” që ka marrë flakë në dhjetë ditët e fundit. Nëntë ditë më parë, një autobus ka marrë flakë në stacionin hekurudhor në Shkup. Sipas informacioneve fillestare, zjarri ka rënë në pjesën e pasme të motorit, më pas është thirrur menjëherë një zjarrfikës.
Incidenti i sotëm është i treti gjatë këtij muaji me një automjet të NTP-së. Më 8 korrik, një autobus dykatësh i NTP-së goditi bordurë betoni në kryqëzimin pranë qendrës tregtare “Mavrovka” dhe bibliotekës universitare “Shën Kliment Ohrit” në qendër të Shkupit. Shoferi më pas u ankua publikisht se automjeti ishte me defekt, ndërsa sindikata akuzoi se automjetet me defekte teknike po lirohen nga depoja, me nënshkrim dhe vulë se janë të sakta./Portalb.mk.