Bullgaria mori masa urgjente për të informuar vendet anëtare të BE-së për “sjelljet e palejueshme” të figurave kryesore politike në RMV, për përpjekjet për të ridefinuar dhe rinegociiuar konsensusin e arritur për kornizën e negociatave dhe për të futur bullgarët në Kushtetutë. Kështu tha kryeministri zyrtar dhe ministri në detyrë i Punëve të Jashtme, Dimitar Gllavçev, në seancën e djeshme në Parlamentin e Bullgarisë, për zhvillimin e proceseve me Maqedoninë e Veriut pas miratimit të “propozimit francez”.
Presidentja e Maqedonisë, Gordana Siljanovska Davkova, në një paraqitje televizive e pyetur se kur do të krijohen kushtet për të rinegociiuar kushtet për anëtarësim në BE, ka treguar se nuk ka thënë se duhet të rinegociiohet. “Korniza negociuese është fakt juridik, por korniza e negociatave mund të interpretohet”, theksoi ajo. “Veprimi i prolonguar është i mundur, interpretimi është i mundur, le të fillojmë negociatat, të mos vërë veto Bullgaria, për të ndërtuar marrëdhënie miqësore. Ne do të nxitojmë të plotësojmë kriteret e Kopenhagës, Bullgaria do të tregojë vullnet të mirë, nuk do të na pengojë dhe kështu do të takohemi më shpejt – do të hyjnë në fuqi ndryshimet (kushtetuese) dhe ne do të jemi miq”, tha Siljanovska.
NUK KA PRESION NDAJ SOFJES
Në Bullgari, ndërtimi i fqinjësisë së mirë shihet kryesisht nga prizmi i asaj që është hedhur në letër – marrëveshja dypalëshe mes dy vendeve dhe propozimi evropian (francez). Siljanovska kujtoi dje – “në asnjë nen të Marrëveshjes të miqësisë dhe fqinjësisë së mirë me Bullgarinë nuk thuhet se duhet të ndryshojmë Kushtetutën dhe të futim bullgarët”.
Vullneti i mirë dhe ndërtimi i urave ekzistojnë si fraza në deklaratat politike nga Bullgaria, por pa operacionalizimin konkret për momentin. Për sa i përket kornizës së negociatave, Sofja nuk devijon nga qëndrimi se detyrimet e marra duhet të përmbushen pa vonesë. Të njëjtin qëndrim dje përsëriti edhe kryeministri zyrtar i Bullgarisë. “Deri më tani, qeveria bullgare i përmbahet rreptësishtë qëndrimit të konfirmuar me vendimin e Kuvendit Kombëtar të 24 korrikut 2022, i cili përcakton kushtet në të cilat Republika e Bullgarisë mund të mbështesë çdo hap të procesit të integrimit evropian të Republikës së Maqedonisë së Veriut. Miratimi dhe hyrja e menjëhershme në fuqi e ndryshimeve kushtetuese, me të cilat bullgarët do të regjistrohen me popujt e tjerë, është parakusht i pashmangshëm për përparim të mëtejshëm në procesin e integrimit evropian të Shkupit”, tha Gllavçev para deputetëve bullgarë.
Në të njëjtën kohë ai theksoi se nuk ka presion ndaj Bullgarisë për lëshime ndaj RMV-së dhe se qëndrimin e Sofjes e ndajnë edhe partnerët e tyre në Union. “Jo vetëm që nuk ka presion, por nëse mund të quhet presion, thirrjes për respektimin e marrëveshjes për ne i bashkohen edhe vendet e tjera të BE-së”, theksoi ai.
E MOTIVUAN EDHE ATHINËN
Gllavçev dje prezantoi suksesin e fundit të arritur në mbledhjen e Këshillit Evropian (27-28 qershor), në lidhje me çështjen e RMV-së, kur Bullgaria e motivoi drejtpërdrejt Greqinë të ankohej se nuk respektohej Marrëveshja e Prespës. “Gjëja interesante që ka ndodhur, sipas Përfaqësisë së Përhershme të Bullgarisë në Bruksel, është se Greqia iu bashkua opinionit tonë për herë të parë. Përkatësisht, kryeministri grek deklaroi se pyetja e bërë nga kryeministri bullgar e detyroi të shprehë mendimin e tij se RMV nuk e respekton Marrëveshjen e Prespës”, tha Gllavçev para deputetëve.
Siç raportojnë mediat bullgare, kryeministri serb vlerësoi se një ton tepër i ashpër ndaj RMV-së tani nuk do të ishte i dobishëm. “Në asnjë rast nuk duhet të lejojmë që të preken interesat e bullgarëve në Maqedoni”, ishte i vendosur Gllavçev, por ai besonte se një ndryshim më i mprehtë mund të pengojë përpjekjet për normalizim. “Për normalizim duhen dy palë – nga ana tjetër nuk ka dëshirë,” tha ai.
Sipas Gllavçevit, “Ministria e Punëve të Jashtme po zhvillonte një mekanizëm për përfaqësimin procedural të bullgarëve në Maqedoninë e Veriut”. (koha.mk)