Zvicra do të jetë pengesa e Italisë për të siguruar kualifikimin në çerekfinalet e Euro 2024. Të kaltrit e Spallettit do të sfidojnë helvetët të shtunën në “Olympiastadion” të Berlinit.
Stephan El Shaarawy thekson se Italia është një skuadër që nuk dorëzohet kurrë, teksa paralajmëron rivalët.
Sulmuesi anësor i Romës në Serie A, e nisi fjalën e tij me barazimin emocionues në minutën e tetë shtesë përballë Kroacisë, që solli vendin e dytë në grupin B.
“Emocion i madh, sepse goli në minutat shtesë të mbush gjithmonë plot gëzim. Pastaj ishte një gol kualifikimi, kështu që jemi edhe më shumë të lumtur.
Ai gol na bëri të vetëdijshëm se kjo skuadër nuk dorëzohet kurrë. Nuk ishte një ndeshje e jashtëzakonshme nga pikëpamja cilësore, por pati angazhim të madh nga të gjithë ne.
Kualifikim i merituar. Ne kemi përgjegjësi të mëdha, por ky ekip përbëhet nga njerëz të mëdhenj që dinë të bashkohen, gëzojnë dhe vuajnë së bashku.
Jemi një ekip shumë cilësor. Por mund të bëjmë edhe më mirë. E treguam veten kundër Shqipërisë, por në dy takimet e tjera mund të kishim bërë më mirë sa u përket cilësisë dhe guximit.
Për mendimin tim, asnjë skuadër nuk është e lumtur të luajë kundër Italisë. Kemi histori dhe jemi kampionët në fuqi. Nuk është kurrë e lehtë të luash kundër nesh”, theksoi El Shaarawy