Kryetari i ASH-së, Arben Taravari ka theksuar edhe njëherë se prioritetet e qeverisë VLEN do të përqendrohen në katër shtylla.
“Përshpejtimi i integrimit evropian, për çka Koalicioni VLEN është garanci në Qeverinë në ardhje, në partneritet me BE-në dhe SHBA-të, partneritet ky që do të forcohet edhe më shumë; Lufta e pa kompromis kundër krimit dhe korrupsionit; Zhvillimi ekonomik i vendit dhe ngritja e standardit jetësor të qytetarëve, dhe Zhvillimi i barabartë rajonal dhe fuqizimi i komunës si njësi bazë e demokracisë”, ka thënë Taravari një ditë para votimit të Qeverisë e ku para zyrtarëve të VLEN-it, bashkë me Izet Mexhitin dhe Bilall Kasamin, theksuan premtimet pët mandatin e ardhshëm.
“Kjo qeveri është garantuese e rrugës evropiane të vendit. Ndryshimet kushtetuese do të ndodhin, dhe negociatat për BE-në do të hapen. Po ashtu, edhe termi 20% do të largohet nga Kushtetuta. Qeveria jonë, po ashtu, do të garantojë bashkëpunim rajonal të barabartë midis vendeve të Ballkanit Perëndimor, veçanërisht në kuadër të Procesit të Berlinit. Vendi do të jetë prodhues e jo konsumues i sigurisë, si anëtare e plotë e NATO-s”, tha Taravari.
Përpos kësaj, sa i takon pozicionit të tij si ministër, Taravari tha se nga dita e hënë, si ministër i Shëndetësisë, do të përqendrohet në zgjidhjen e problemit me kompresorët në sallat e operacionit në Qendrën Klinike “Nënë Tereza” në Shkup, shkarkimin e drejtorëve ekonomikë në çdo institucion publik shëndetësor, nëse e lejon ligji që në ditën e parë, digjitalizimin e Shëndetësisë, përfshirë edhe Farmacinë, Stomatologjinë, të gjithë sistemin shëndetësor publik dhe privat, rifillimin e punimeve për përfundimin e Spitalit në Kërçovë dhe Spitalin Klinik në Shtip, dhe bashkimin e Qendrave Klinike.
Taravari ka thënë se do të bëjë depolitizimin e UT-së, si dhe ndarje të një buxheti më të lartë për këtë universitet, përfshirë për herë të parë edhe për kërkime shkencore.