Nënkryetari i BDI-së, Arbër Ademi, ka reaguar ndaj një emri që mandatari Hristijan Mickoski e përmendi sonte gjatë shpalosjes së propozimeve për ministra në Qeverinë e ardhshme VMRO-DPMNE, VLEN dhe ZANM.
“Marrëveshja e Ohrit për herë të parë pas vitit 2001 në dorë të një serbi me bindje putiniste! Ndryshimi sapo filloi!”, ka shkruar Ademi në Facebook. Po për kë e ka fjalën?
Emri që do të propozohet për të qenë ministër që do të drejtojë Ministrinë për Marrëdhënie mes Bashkësive është Ivan Stoillkoviq. Këtë Ministri deri më tani e ka udhëhequr Artan Grubi. Ivan Stoillkoviq është kryetar i Partisë Demokratike të Serbëve, pjesë e koalicionit me VMRO-DPMNE-në, ndërsa mandatari Mickoski gjatë prezantimit tha se do të jetë edhe një prej zëvendëskryeministrave në Qeveri.
Po kush është Stoillkoviq, që Ademi nga BDI e quan “me bindje putiniste”?
Së fundi emri i tij u përfol shumë për shkak të qëndrimit që kishte për Rezolutën e OKB-së për gjenocidin e Serbrenicës. Pas vendimit të MPJ-së së RMV-së për ta mbështetur Rezolutën, Stoillkoviq e quajti rezolutën “diznejlend nekrofil”. Kjo pati nxitur edhe reagime nga komuniteti boshnjak në Maqedoni.
Krahas kësaj, po të kërkosh online për emrin e Ivan Stoillkoviqit, dalin përmbajtje të mjaftueshme që tregojnë për qëndrimet e kryetarit të kësaj partie serbe në Maqedoninë e Veriut. Jo më larg se në maj të 2023-shit ai mori pjesë në Forumin e Sigurisë që u mbajt në Moskë, ku ishin edhe presidenti i Republikës Srpska, Milorad Dodik dhe drejtori i Agjencisë Serbe për Siguri dhe Informacion, Aleksandar Vulin.
Po bashkëpunime me rusë Stoillkoviq ka pasur edhe më herët. Në 2018-tën ai ishte pjesë e një delegacioni të partive parlamentare të Maqedonisë që u takuan me zëvendëssekretarin e Këshillit të Përgjithshëm të partisë Rusia e Bashkuar, Sergej Zheljeznak. Pas takimit mediat raportonin se “zhvillimi i bashkëpunimit politik, ekonomik dhe kulturor, si dhe rëndësia e ruajtjes dhe forcimit të lidhjeve shpirtërore ndërmjet Rusisë dhe Maqedonisë ishin temat e bisedimeve”.