Filluan punimet për ndërtimin e pishinës së parë në Çair, projekt ky që vite me radhë ka qëndruar vetëm në letër. Pishina është e dedikuar për nxënësit e shkollave të komunës së Çairit dhe pritet të jetë gati për festat e nëntorit. Ajo do të jetë e mbyllur dhe e përshtatshme për të gjitha stinët e vitit. Pas hyrjes në funksion të kësaj pishine, kreu i Çairit, Visar Ganiu, paralajmëroi mësim të obligueshëm të notit nëpër shkollat fillore. Ai pajtohet se ndërtimi i pishinës është i vonuar, por u zaotua se tani e tutje do të punohet në mënyrë intensive për këtë dhe shumë projekte të tjera në këtë komunë.
“Kjo pishinë do të jetë 620 metra katrorë, do të jetë pishinë me të gjitha standardet për not, ku do të kenë mundësi dhe do ta bëjmë të obligueshëm mësimin e notit nëpër shkollat fillore…. Vlera diku përafërsisht është rreth 600 mijë euro dhe kjo është një lëshim që e bëra edhe pse kompania e ka kontratën që për një vit e gjysmë ta mbarojë këtë projekt ne kemi marrë garanci gojore që për festat e nëntorit në komunën tonë do të kemi mundësi në mënyrë solemne ta bëjmë përurimin e objektit”, deklaroi Visar Ganiu, kryetar i Komunës së Çairite.
Qytetarët e mirëpresin këtë projekt. Ata besojnë se këtë herë përfundimisht Çairi do të ketë pishinën e parë.
“Pas disa viteve, komuna e Çairit po bën një objekt shumë të rëndësishëm dhe shumë të nevojshëm për fëmijët, edhe për mbesat edhe për nipërit edhe për krejt”, tha një qytetar.
“Besoj që po se tash do të ketë fonde, do të ketë të ardhura dhe do t’i kryejë. Në mandatin që e ka, deri në fund të mandatit besoj se do të kryhet”, u shpreh një tjetër qytetar.
“Kjo është një gjë shumë e mirë, sepse çdo fëmijë që do të regjistrohet në shkollë dhe në kohën e kaluar ai do të mund të mësohet të notojë, do të zhvillohen me not. Mendoj se do të realizohet”, theksoi një qytetar.
“Nëse arrihet që në afat të shpejtë të ndërtohet pishina, edhe arsimtarët e edukatës fizike do të kenë mundësi që t’i mësojnë fëmijët të notojnë. Më herët kemi shkuar edhe në pishina të tjera, por ka pas nevojë komuna jonë të ketë një pishinë të këtij lloji dhe besoj se do të jetë mirë edhe për qytetarët edhe për arsimtarët edhe për nxënësit”, deklaroi Sedat Baftiu, Profesor i Edukatës fizike.
Ndërtimi i kësaj dhe disa pishinave të tjera në Çair ishin premtime edhe të pushtetit lokal edhe të atij qendror vite me radhë. /Alsat.mk