Naser Pajaziti
Në Maqedoninë e Veriut sot po zhvillohet raundi i dytë i zgjedhjeve presidenciale dhe votimet për zgjedhjet parlamentare.
Në garën për president në balotazh janë presidenti i deritanishëm, Stevo Pendarovski nga koalicioni i LSDM-së dhe Gordana Siljanovska-Davkova nga koalicioni i VMRO-DPMNE.
Për tu zgjedhur presidenti duhet që në votime të dalin 40% e votuesve për tu arrit census i nevojshëm, apo mbi 725 mijë votues nga 1.814.317 votues, përcjell INA.
Frika për rrezik për tu arritur censusi është shprehur në mënyrë indirekte nga qarqe politike.
Raundi i parë me 49.95%
Në raundin e parë të presidencialeve votuan 905.971 votues apo në përqindje 49.93%, ku 2.71% ishin vota të pavlefshme.
Gordana Siljanovska Davkova mori 363.086 vota (40.08 %), Stevo Pendarovski me 180.500 vota (19.92%).
Bujar Osmani nga Fronti Evropian mori 121.088 vota (13.37%), Arben Taravari nga koalicioni VLEN mori 83.393 vota (9.20%).
Maksim Dimitrevski nga ZNAM mori 83.856 vota (9.26%). Biljana Vankovska Cvetkovska nga Levica (E Majta) mori 41.331 vota (4.56%) dhe Stevço Jakomovski nga GROM mori 8.121 vota (0.90%).
Sipas këtyre shifrave, votat për kandidatët shqiptarë ishin 204.481 vota.
Çka nëse nuk do të arrihet censusi
Nëse nuk arrihet numri i nevojshëm i votuesve prej 40%, atëherë zgjedhjet shpallen të pasuksesshme nga Komisioni Shtetëror Zgjedhor (KSHZ). Ky institucion përgjegjës duhet që në afat prej 40 ditëve të shpallë zgjedhje të reja presidenciale.
Në këto rrethana detyrën e presidentit sipas Kushtetutës e kryen kryetari i Parlamentit. Ai do të ketë të gjitha kompetencat e presidentit, duke përfshirë edhe ndarjen e mandatit për formimin e Qeverisë së re.
Por mbeten paqartësi se mandatin për formimin e Qeverisë së re e ndan kryetari aktual i Parlamentit që është Jovan Mitrevski nga LSDM, apo kryetari i ri i Parlamentit që do zgjidhet pas konstituimit të Parlamentit.
Nëse do ndodhë ky skenar i dështimit të presidencialeve, atëherë Maqedonia e Veriut futet në një labirinth të ri që do prodhojë krizë politike dhe zgjedhje të sërishme presidenciale. Por a do ndodhë kjo do jetë e qartë deri në mesnatë?