Mijëra palestinezë falën namazin e Fitër Bajramit në xhaminë Al-Aqsa në Jerusalemin Lindor të pushtuar.
Lutjet në xhaminë Al-Aqsa kanë qenë relativisht të heshtura këtë vit mes luftës së Izraelit kundër Gazës dhe ushtarëve izraelitë që kontrollojnë dokumentet e identifikimit të besimtarëve.
Xhamia Al-Aqsa është një nga vendet më të shenjta në botë për myslimanët.
Autoritetet izraelite kanë bllokuar mijëra palestinezë në Bregun Perëndimor që të arrijnë në Al-Aqsa për t’u lutur gjatë muajit të shenjtë mysliman të Ramazanit.
Vitin e kaluar në të njëjtin vend u mblodhën 120 mijë besimtarë. Edhe atëherë, pjesëtarët e forcave të sigurisë izraelite kanë rrahur me shkopinj disa prej besimtarëve që kanë dashur të hyjnë në xhami.
Konflikte të shpeshta midis Izraelit dhe Palestinës ekzistonin edhe atëherë, por gjithçka u përshkallëzua në tetor të vitit të kaluar kur ushtria izraelite (IDF) filloi luftë në Gaza për shkak të sulmeve të Hamasit ndaj civilëve izraelitë në një festival. Që atëherë, ka pasur luftë dhe vrasje të palestinezëve, shumë prej të cilëve janë fëmijë.
Negociatat e fundit për armëpushim u mbajtën këtë javë, por nuk u arrit marrëveshje as për Bajramin. Gaza qendrore u bombardua gjatë natës.