Edhe në këto zgjedhje parlamentare, nëpër zona zgjedhore, në lista radhitja bëhet nga kryetari i partisë e të tjerët me radhë. Si te Fronti Europian, ashtu edhe te VLEN, listave zgjedhore do t’u prijnë kryesisht krerët e partive politike. Te Fronti Europian, në zonën gjashtë bartës liste do të jetë kreu i BDI-së Ali Ahmeti, e në zonën 5 do të jetë kreu i Aleancës për Shqiptarët, Ziadin Sela. Në zonën 1 do të jetë sekretari organizativ i BDI-së, Blerim Bexheti ndërsa në zonën dy Sadulla Duraku që për momentin nuk ka një funksion partiak por vetëm anëtar i këshillit të përgjithshëm.
Edhe te koalicioni opozitar VLEN, krerët e partive politike përpos Arben Taravarit, janë bartës liste nëpër zona zgjedhore. Siç është konfirmuar deri tani, kreu i Lëvizjes Demokratike Izet Mexhiti do të jetë bartës liste në zonën 1, kreu i Alternativës Afrim Gashi do t’i prijë zonës 2 ndërsa në zonën 6 listën do ta udhëheqë Bilall Kasami, kryetar i Lëvizjes Besa.
Por a janë të lartëpërmendurit të duhurit për bartës liste apo janë figura të vjetra politike? Sipas analistit politik Albert Musliu, është shumë normale që krerët e partive politike t’u prijnë listave por për këtë do të vendosin qytetarët në zgjedhje. Shton se fatkeqësisht më shumë kemi liderë politik se sa zona zgjedhore. Megjithatë uron që në këto zgjedhje të mos ketë luftë të nivelit të ulët politik por të dalin me oferta konkrete për qytetarët, me vizion dhe orientim të qartë politik.
“Është normale që liderët politik t’i mbajnë listat në vendet ku është fronti më i madh, dmth ku bëhet lufta. Aty është normale të jenë bartës liderët e partive politike. Por tek ne në këtë cikël zgjedhor ka shumë liderë politik dhe normalisht nuk mund të jenë të gjithë me një njësi zgjedhore kështu që shpërndahen. Unë nuk e kam të drejtën të komentoj liderët njëri pas tjetrit, është e drejtë sovrane e votuesve por besoj se do të kemi një garë shumë interesante. E thash, kemi më shumë liderë në këtë cikël se sa njësi zgjedhore ku realisht shqiptarët garojnë”, tha Albert Musliu, analist.
Nga ana tjetër profesori universitar Bashkim Selmani, thotë se skenës politike duhet t’i ofrohet një freskim në aspekt të energjisë pozitive por shton se në fakt kemi të bëjmë me grupe miqësie të ndërlidhur shpirtërisht dhe financiarisht.
“Kjo na jep të kuptojmë se ne jemi të organizuar në grupe njerëzish që gradualisht janë më tepër grupe miqësie, të ndërlidhur shpirtërisht, materialisht, financiarisht mes vete dhe sikur nuk pranon organizma tjerë nga jashtë. Kjo nuk i bën nderë qoftë partive politike por edhe interesit të përgjithshëm të shqiptarëve. Mirëpo janë përzgjedhje më tepër të liderëve partiak, të cilët kanë besim tek ata njerëz si parti, ndoshta është edhe e qëlluar për interesat partiake. Mirëpo është e nivelit jo freskues në aspektin e energjisë pozitive sepse në politikë, qëndrimi i gjatë të shkrinë, edhe engjëjt i shëndron në dreqër”, pohoi Bashkim Selmani – analist.
Përndryshe Fronti Europian këtë radhë për herë të parë mer pjesë edhe në zonat tre dhe katër meqenëse ka lidhur koalicion me dy parti turke. Në zonën tre bartës do të jetë Sulejman Baki ndërsa në zonën katër Enver Husein. Risi te koalicioni VLEN është se në zonën pesë bartës liste pritet të jetë ish myftiu i Strugës, Salim Sulejmani.
https://youtu.be/Z2MM5Z4tMvQ