“Parlamenti bullgar nuk vendos kushte të ndryshme, por ne insistojmë në respektimin e parakushteve të dakorduara që Republika e Maqedonisë së Veriut të fillojë negociatat për anëtarësim në Bashkimin Evropian,” ka deklaruar kryeministri i Bullgarisë, Rosen Zhelyazkov, në emisionin ‘Nedela 150’ të BNR-së, si përgjigje për pyetjen nëse Bullgaria do të bënte një hap pas duke tërhequr kërkesën që bullgarët të përfshihen në Kushtetutën e Maqedonisë.
“Nuk mendoj se ekziston fare një bisedë e tillë,” ka theksuar ai dhe shtoi:
“Ne nuk kemi marrëdhënie të pazgjidhura bilaterale me ta. Kemi marrëveshje për Fqinjësi të Mirë dhe protokoll të nënshkruar për të. Fakti që protokolli po kontestohet para Gjykatës Kushtetuese të RMV-së është pjesë e koreografisë së brendshme politike që po ndodh në Shkup, përfshirë edhe para syve të Këshillit Evropian,” ka thënë Zhelyazkov.
“Bullgaria nuk shpreh asnjë qëndrim tjetër përveç qëndrimit të Këshillit Evropian – të përfshihen ndryshimet kushtetuese dhe të merren parasysh të gjitha dispozitat e parashikuara në protokoll, që janë pjesë e propozimit kompromis të vitit 2022. Ne nuk vendosim asnjë kusht ndryshe nga ai propozim i miratuar në 2022. Nëse autoritetet në Shkup duan të jenë pjesë e BE-së, ata duhet të ecin në këtë rrugë, që është pjesë e qëndrimit të vetë Bashkimit Evropian ndaj Shkupit,” ka theksuar kryeministri bullgar.
Në pyetjen nëse është i mundur një protokoll i ri bilateral mes Bullgarisë dhe Maqedonisë që do t’i jepte garanci Shkupit se nuk do të ketë pengesa të tjera në rrugën evropiane, ai ka thënë se nuk mund të ketë garanci më të madhe se vendimi unanim i Parlamentit Bullgar.
“Duhet t’u jetë e qartë kolegëve në Shkup se ne qëndrojmë pas këtij qëndrimi, sepse është parimor. Nuk do të ndryshojmë asgjë në drejtim të kthimit të kësaj çështjeje në spor bilateral, as në kërkimin e ndikimeve të padukshme apo bashkëveprimeve me lojtarët kryesorë politikë në botë,” ka potencuar Zhelyazkov.