Një dokument zyrtar i datës 13 shkurt 2025, i firmosur nga Drejtori i Spitalit të Tetovës, Agim Berisha, dhe Bordi drejtues i këtij institucioni, i është drejtuar ish-ministrit të Shëndetësisë Arben Taravari me një sërë kërkesash urgjente – përfshirë punësimin e personelit mjekësor.
Dokumenti, i cilësuar si “origjinal dhe i pakontestueshëm”, është publikuar sot për opinionin publik si dëshmi se kërkesat legjitime të spitalit janë neglizhuar në mënyrë të përsëritur nga ish-ministri i shëndetësisë.
“Ky është dokumenti origjinal që drejtori i Spitalit të Tetovës dhe bordi i kanë adresuar ministrit disa herë. Çdo herë është sabotuar!”, thuhet në reagimin shoqërues të dokumentit.
Sipas përfaqësuesve të spitalit, çdo përpjekje për të paraqitur justifikime populiste për mosveprimet është mashtruese, veçanërisht kur ato vijnë nga persona të afërt me Aleancën për Shqiptarët (ASH).
“Të quash ‘arsyetim’ këtë dokument është fyerje për mjekët dhe pacientët. Aktivisti i ASH-së që mundohet të justifikojë situatën, thjesht nuk arrin ta kuptojë realitetin në të cilin ndodhet spitali”, thuhet më tej në reagim.
Zbulimi i dokumentit vjen në një kohë kur në Tetovë po protestojnë infermierët për mungesë të pagave dhe kushteve të papërshtatshme të punës, duke e bërë këtë dosje edhe më të ndjeshme politikisht dhe moralisht për aktorët që kanë qenë pjesë e menaxhimit të shëndetësisë.
